Թուրքական Dünya Bülteni կայքի փոխանցմամբ՝ Թուրքիայի վարչապետ Ռեջեփ Էրդողանը 8 նախարարների ուղեկցությամբ վաղը մեկնելու է Հռոմ՝ մասնակցելու Միջկառավարական համաժողովին: Իտալիայում Էրդողանը հանդիպելու է նախագահ Ջորջիո Նեապոլիտանոյի ու վարչապետ Մարիո Մոնտեի հետ:
Այդ հանդիպումներում կողմերը քննարկելու են բոլոր ոլորտներում երկկողմանի կապերը, Եվրոպայի վրա տնտեսական ճգնաժամի ազդեցությունը, տարածաշրջանային ու գլոբալ խնդիրներ: Իտալական Corriere Della Sera թերթը չի բացառում, որ Էրդողանը կարող է բարձրացնել Սիրիայի հարցում ՆԱՏՕ-ի միջամտության հարցը:
Իտալիա այցելելուց առաջ թերթին տված հարցազրույցի ժամանակ Էրդողանը Սիրիայի մասին հայտարարել է. «Ասադի ռեժիմն ավարտվեց: Նա սպանեց 10,000 մարդու: 25,000 մարդ Սիրիայից փախավ Թուրքիա, իսկ 100,000-ը՝ Հորդանան: Մի երկրում, եթե իշխանությունն իր ժողովրդի դեմ զենք և տանկ է ուղղում, ապա այդ երկրում չկա արդարություն:
Մենք Սիրիայի հետ ունենք 900 կիլոմետրանոց սահման, և միշտ լավ հարաբերություններ ենք ունեցել: Դժբախտաբար, Ասադն ուշադրություն չդարձրեց Թունիսի դեպքերից հետո մեր արած զգուշացումներին: Այժմ Սիրիայի վիճակը շատ լուրջ է: Եթե սահմանային խախտումները շարունակվեն, ապա ՆԱՏՕ-ի կանոնադրության 5-րդ հոդվածի համաձայն՝ դա կվերածվի ՆԱՏՕ-ի խնդրի:
Ասադը ցայժմ չի կատարել Անանին տված որևէ խոստում: Սպանությունները շարունակվում են, ՄԱԿ ԱԽ-ը պետք է ավելի խիստ բանաձև ընդունի Սիրիայի վերաբերյա: ԵՄ-ը չպետք է Սիրիայի հարցում սահմանափակվի արտաքին դիտորդի դերով: Սիրիայում ռազմական միջամտության ձեռնարկումը չի վերաբերում միայն Թուրքիային, դրա համար անհրաժեշտ են ՄԱԿ ԱԽ-ի ու ԱՊԼ-ի համատեղ քայլերը»:
