«Թող այսօր անցնի, ես ինչ որ պետք է, կասեմ: Շատ բան ունեմ ասելու, էն, ինչ որ ասացիք, շատ քիչ է, բայց հիմա խոսելու տրամադրություն չունեմ: Վաղը կխոսեմ, շատ բան կասեմ»,- «Առաջին լրատվական»-ի հետ զրույցում, արձագանքելով լրատվամիջոցներում տեղ գտած տեղեկատվությանը, թե օրեր առաջ Մասիսում տեղի ունեցած ծեծկռտուքից հետո ԲՀԿ-ի կողմնակիցները կոտրել են ՀՀԿ-ի մի քանի մեքենաներ, այդ թվում՝ նաև Մասիսի ոստիկանության բաժնի պետի տեղակալի մեքենան, քարով հարվածել ու կոտրել ոստիկանապետ Համլետ Ղամբարյանի գլուխը, ասաց թիվ 16 ընտրատարածքում առաջադրված ՀՀԿ-ական թեկնածու
Մուրադ Մուրադյանը: Վերջինս շատ անտրամադիր էր, տպավորություն էր, թե ծեծվածներից մեկն էլ նա է: Հարցին, թե ինչպիսին է Մասիսում ընտրական մթնոլորտը, նա պատասխանեց. «Էս երեք ամիս է` լարված է, ինձ թողեք, վաղը կխոսեմ»:
Մյուս թեկնածուն` ԲՀԿ-ական պատգամավոր Տիգրան Ստեփանյանը հերքեց նշված տեղեկատվությունը. «100 տոկոսով դա իրականությանը չի համապատասխանում, ոստիկանապետը հենց հիմա աշխատանքի մեջ է, ոչ մեկն էլ չի կարող նրա գլուխը ջարդել: Մթնոլորտը շատ նորմալ է, ոչ մի բան չկա»: