Օրերս Aravot.am-ը Արթիկում քարոզարշավի եկած դաշնակցական պատգամավոր Ռուզաննա Առաքելյանին հարցրել է, թե ինչ գնահատական կտա քարոզարշավին, իրենց ծեծելու փորձ երբևէ արե՞լ են, ինչպես Երևանի Մալաթիա- Սեբաստիա համայնքում հարձակվեցին ՀԱԿ ակտիվիստների վրա, նույնիսկ ջարդեցին Բաբկեն Գարոյանի քիթը:
«Այո, նման որոշ դեպքեր կան, բայց ասեմ Ձեզ՝ որքան որ առնչվում եմ տեղամասերի հետ, այնուամենայնիվ խանգարիչ հանգամանք չկա, դա ինչ-որ իմաստով ներշնչող է, այսինքն՝ չեն խանգարում քարոզարշավը անցկացնելուն: Բայց այս միջադեպերը, գիտեք, կարծում եմ, որ խորքում անձնական բնույթ են կրում»,- կարծիք է հայտնել պատգամավորը:
Թերթի ճշգրտող այն հարցին էլ` անձնակա՞ն, ո՞չ գաղափարական, տիկին Առաքելյանն ասել է. «Ի՞նչ գաղափարական, եթե հիմա ինձ ասեք՝ որտեղ է դրված այդ ընդհարման գաղափարը, ես ձեզ կպատասխանեմ՝ ո՞ր գաղափարը, անձեր են կռվում իրար հետ՝ իրար տեղ գրավելու համար: Դաշնակցությունն է միակ ուժը Հայաստանում, որ գաղափար ունի, ես սա հպարտությամբ եմ ասում, բայց, ցավով, գիտեք, շատ կուզենայի, որ Դաշնակցության կռիվը գաղափարի հետ լիներ և գաղափարի համար լիներ. շատ հայրենիքներ այդպես են պահվել, գաղափարներ են մրցակցության մեջ եղել, թե ով իր հայրենիքի, ժողովրդի, ազգի համար ավելին կանի»,- եզրափակել է տիկին Առաքելյանը:
