Ֆինանսների նորանշանակ նախարար Վաչե Գաբրիելյանը այսօր լրագրողների հետ հանդիպման ժամանակ նշեց, որ այս պահին որևէ կադրային փոփոխություն նախարարությունում չի իրականացրել: «Մի շարք փոփոխություններ տեղի են ունենում անցած տարվա վերջին` դեռևս իմ նշանակումից առաջ եղած փոփոխությունների հետևանքով, որոնք ընթացիկ խնդիրների հետ են կապված: Օրինակ` տեղի է ունեցել վերակազմավորում, և որոշ աշխատողներ վերանշանակվել են, որոշները` կվերանշանակվեն` համաձայն այն ստանդարտ գործընթացների, որոնցով կարգավորվում է քաղաքացիական ծառայության ոլորտը: Ինչ վերաբերում է իմ կողմից նախաձեռնվող փոփոխություններին, ապա ես նույնպես նախատեսում եմ կառուցվածքային փոփոխություններ, որոնք, սակայն, չեն լինի մոտակա ամսվա ընթացքում»,- նշել է նախարարը: Հարցին իպատասխան, թե կոնկրետ ի՞նչ կառուցվածքային փոփոխությունների մասին է խոսքը, նա ասել է, որ կիրականցվեն բաժինների և վարչությունների հետ կապված փոքրամասշտաբ փոփոխություններ: Իսկ այն հարցին, թե ինքը ի՞նչ նորություններ ու նորամուծություններ է մտցնելու ֆինանսերի նախարարության աշխատանքի մեջ, Վ. Գաբրիելյանը պատասխանել է, թե այս պահին ինքը դեռ ադապտացման խնդիր ունի: «Իմ անձնական գերակայությունները լավ կլինի ամփոփել իրավիճակը շատ ավելի լավ հասկանալուց հետո: Ֆինանսների նախարարության հսկա մեխանիզմին ամբողջովին տիրապետելու և առավել համապարփակ միջոցառումների անցկացման համար ես ունեմ որոշակի ադապտացիոն, սովորելու խնդկիրներ»,- ասաց նախարարը: