«Մուսուլման եղբայրներ» խմբավորումն իր կողմնակիցներին կոչ է արել ուրբաթ օրը մասնակցել Թահրիրի հրապարակի ցույցին, որի նպատակը նախկին փոխնախագահ և հետախուզության նախկին ղեկավար Օմար Սուլեյմանի մասնակցությունը նախագահական ընտրություններում թույլ չտալն է։
Միաժամանակ երիտասարդական լիբերալ «Ապրիլի վեց» շարժումը համանման ցույց է առաջարկել անցկացնել ապրիլի 20-ին՝ դարձյալ Թահրիրի հրապարակում:
Ավելի վաղ նախագահի մի քանի թեկնածուներ պայմանավորվել էին ընդդիմանալ Սուլեյմանի թեկնածության առաջադրմանը: Մասնավորապես՝ կողմերը համաձայնել էին պաշտպանել «Քաղաքական մեկուսացման մասին օրենքի» նոր լրացումը, որպեսզի օրենսդրորեն արգելեին Մուբարաքի կողմնակիցներին նախագահական ընտրություններում թեկնածություն առաջադրել:
Սուլեյմանից բացի, նախագահի պաշտոնի համար իր թեկնածությունն է առաջադրել նաև նախկին վարչապետ ու քաղաքացիական ավիացիայի ղեկավար Ահմեդ Շաֆիկը:
Մուբարաքի կողմնակիցների առաջադրումը քննադատել է «Մուսուլման եղբայրներ» շարժման կողմից առաջադրված թեկնածու Հայրատ Աշ-Շատիրը: Նրա խոսքերով` Սուլեյմանի հաղթանակի դեպքում եգիպտական ժողովուրդը նորից փողոց դուրս կգա:
Եգիպտոսի նախագահական ընտրություններին մասնակցելու հայտ է ներկայացրել 23 քաղաքական գործիչ: Փորձագետների կարծիքով՝ հիմնական պայքարը ծավալվելու է Մուբարաքի կողմնակիցների և իսլամիստների միջև:
Մուբարաքի 30-ամյա կառավարումից հետո առաջին նախագահական ընտրությունները Եգիպտոսում կկայանան մայիսի 23-ին և 24-ին:
