«Հաշմանդամները պետք է ներգրավված լինեն ընտրացուցակներում, և իրենց խնդիրների մասին ԱԺ-ում պետք է բարձրաձայնեն հենց իրենք, քանի որ ավելի լավ կարող են ներկայացնել իրենց առջև ծառացած խնդիրները, և դրանք ավելի տեսանելի կլինեն»,- այս մասին լրագրողների հետ հանդիպմանը ասաց «Հարմոնիա» ՀԿ-ի նախագահ Ալբերտ Աբգարյանը:
Նրա խոսքերով՝ եվրոպական մի շարք երկրների խորհրդարաններում կան հաշմանդամ պատգամավորներ, և դա շատ գովելի է։
Քննարկվող հարցին անդրադարձավ «Փարոս» ՀԿ-ի նախագահ Սուրեն Օհանյանը՝ նշելով. «Սկսած 2003 թվականից՝ մենք զբաղվում ենք հաշմանդամ անձանց ընտրական իրավունքով, սակայն սա չի նշանակում, թե հաշմանդամների բոլոր խնդիրները լուծված են, և մնում է միայն ընտրական իրավունքը:
Փորձը ցույց տվեց, որ սա հաշմանդամ անձանց համար ամենակարևոր իրավունքներից մեկն է, որը պետք է պաշտպանված լինի: Այս գործով զբաղվող ՀԿ-ները նկատեցին, որ այս դաշտը բաց է, և սկսեցին զբաղվել խնդրով: Արդյունքում պարզվեց, որ մեր երկիրը հաշմանդամների մասնակցության առումով պատրաստ չէ ընտրության»:
Նրա խոսքերով՝ 2003 թվականին տեղամասերի 87 տոկոսը հաշմանդամների համար անմատչելի էր: 2007-2008 թթ. վիճակը փոխվել է ընդամենը 2 տոկոսով, որը կատարվել է ՀԿ-ների դրամաշնորհների միջոցով՝ առանց պետական միջամտության. «Այստեղ արդեն խախտվում է հավասարության սկզբունքը»:
Ալբերտ Աբգարյանը փաստեց, որ այսօր արդեն ունենք շատ կաղապարներ, և հաշմանդամները ունեն ինքնուրույն ընտրելու իրավունք. «2007 թվականին «Փարոս» ՀԿ-ի հետ միասին նախաձեռնեցինք ստվարաթղթե կաղապարների ներդրումը Հայաստանում: ԿԸՀ կողմից կայացվեց որոշում, որով հնարավորություն տրվեց տեսողության խնդիր ունեցող մարդկանց քվեարկել ինքնուրույն: Այն իրենից ներկայացնում է ստվարաթղթե կաղապար, որի մեջ դրվում է քվեաթերթիկը, և բրալյան սիտեմով մարդիկ քվեարկում են:
Մենք ուսումնասիրել ենք ընտրատեղամասերը: Ունենք 82 ընտրատեղամաս, որոնք պատրաստ են ընդունել հաշմանդամներին: Հայաստանում կա հաշմանդամություն ունեցող 172.356 մարդ, որից 164.368-ը ընտրող է, ինչը ընտրողների 5.8 տոկոսն է»:
