Վարդան Օսկանյանին Մարտի 1-ի մեջ մեղադրելն այլ բան է, իսկ ազատ ընտրությունների վերաբերյալ համաձայնությունն` այլ: «Առաջին լրատվական»-ի հետ զրույցում նման տեսակետ հայտնեց 2008 թ. Մարտի 1-ի զոհ Տիգրան Խաչատրյանի մայրը՝ Ալլա Հովհաննիսյանը` անդրադառնալով 4 քաղաքական ուժերի միջև կնքված միասնական շտաբի ձևավորման հարցին։
Հիշեցնենք, որ միասնական շտաբի ձևավորման մասին հայտարարությունը ստորագրել են ՀԱԿ համակարգող Լևոն Զուրաբյանը, ԲՀԿ անդամ Վարդան Օսկանյանը, ՀՅԴ պատգամավոր Արմեն Ռուստամյանը և «Ժառանգություն» կուսակցության փոխնախագահ Ռուբեն Հակոբյանը:
Ալլա Հովհաննիսյանը նշեց, որ Վարդան Օսկանյանը պատասխանատվություն է կրում Մարտի 1-ի ոճրագործության համար, իսկ Տիգրան Խաչատրյանի մայրը Վարդան Օսկանյանին չի կապում Ռ. Քոչարյանի հետ: Նա նաև չի կարծում, թե ԲՀԿ-ն Ռ. Քոչարյանն է ղեկավարում: «Միասնական շտաբի ձևավորման համաձայնությունը եղել է, որպեսզի մարդկանց քվեն տեղ հասնի, իսկ եթե իրոք կամք կա՝ մարդկանց քվեն տեղ հասցնելու և արդար ընտրություններ իրականացնելու, ես գտնում եմ, որ ամեն ուժի հետ կարելի է համաձայնության գալ, եթե իսկապես կա այդ կամքը: Ես գտնում եմ, որ այսօր, այս պահին միգուցե ԲՀԿ-ն խնդիր ունի ազատ և արդար ընտրություններ անցկացնելու, ուստի ես գտնում եմ, որ բոլոր ուժերի հետ կարելի է համագործակցել։ Այլ հարց է, որ նրանք այդ քայլին գնան ձևական, և այդ շտաբը ոչ մի աշխատանք չկատարի»,- մեկնաբանեց Ա. Հովհաննիսյանը` հավելելով, որ Մարտի 1-ի մեջ մեղադրելն այլ է, ազատ ընտրությունների վերաբերյալ համագործակցելն` այլ:
Ըստ նրա` Վարդան Օսկանյանը մեղավոր է. «Գտնում եմ, որ մի օր, երբ օրը գա, երբ բոլորը պատասխանատվություն կրեն Մարտի 1-ի համար, Մարտի 1-ը բացահայտվի՝ իշխանափոխությունից հետո, Օսկանյանը ևս իր պատասխանատվությունը կկրի, բայց այս պահին ընտրությունների վերաբերյալ նրանց հետ համաձայնության գալը ճիշտ եմ համարում, միգուցե այս շտաբի ստեղծումով և ազատ ընտրություններով տեղի ունենա իշխանափոխություն, որից հետո Մարտի 1-ը կբացահայտվի»:
Հիշեցնենք, որ երեկ չորս քաղաքական ուժերի լիազոր ներկայացուցիչները համատեղ հայտարարություն ստորագրեցին, որով տվեցին միասնական շտաբ ձևավորելու իրենց համաձայնությունը։ Շտաբը պետք է հանրային վերահսկողություն իրականացնի գալիք ընտրությունների ժամանակ։