Այս գիշեր Կալիֆոռնիայի Վանդերբերգ ռազմաբազայից արձակվել է Delta IV հրթիռ-կրիչ՝ ԱՄՆ ռազմա-տիեզերական հետախուզության ազգային վարչության (NRO) «գերգաղտնի» բեռով:
Ինչպես հաղորդում է Associated Press-ը, հրթիռն արձակվել է տեղի ժամանակով 16:12-ին: Հրթիռի արձակման նպատակի և առաջադրանքների մասին NRO-ն ոչինչ չի հայտնում:
Ամերիկյան հեռուստաալիքներով հրթիռի արձակման հեռարձակումը ընդհատվել է թռիչքից 3 րոպե անց:
«Մենք միայն տեսանք, որ հրթիռի բացթողումը հաջող է անցել»,- ասել է առցանց հեռարձակման մեկնաբան Դոն Սփենսերը:
Որոշ վերլուծաբաններ ենթադրում են, որ հրթիռը, հնարավոր է, ուղեծիր է հասցրել նոր սերնդի ամերիկյան ռադիոտեղակայման արբանյակ, որը նախատեսված է գիշերային պայմաններում և վատ եղանակի ժամանակ Երկրի զոնդավորման համար: Վաշինգտոնի GlobalSecurity.org հետազոտական կենտրոնի մասնագետ Չարլզ Վիքի խոսքերով՝ վերջին շրջանում ԱՄՆ-ը ակտիվ աշխատանքներ է տանում իր հին ռադիոտեղակայման արբանյակներն ավելի նոր մոդելներով փոխարինելու վրա:
Վանդերբերգի բազայից հաջորդ հրթիռի արձակումը նախատեսվում է ապրիլի 10-ին: