Թուրքական Hürriyet թերթի փոխանցմամբ՝ ոչ լրիվ կես տարում Թուրքիայում և նրան հարակից երկրներում տեղի է ունեցել տարբեր հզորության ավելի քան 13,000 երկրաշարժ: Մասնագետները դա կապում են 2011 թվականի հոկտեմբերի 23-ին Վանի նահանգում տեղի ունեցած հզոր երկրաշարժի հետ:
Այն ժամանակ ստորերկրյա ցնցման ուժգնությունը գերազանցել էր 9 բալը, զոհվել էր ավելի քան 600 մարդ, հազարավոր մարդիկ վիրավորվել էին, իսկ տասնյակ հազարները՝ զրկվել տանիքից:
Դրանից հետո Վանի նահանգում ու մերձակայքում գրանցվել է ընդհանուր առմամբ 9367 երկրաշարժ, որոնց հզորությունը կազմել է 1.5-5.8 մագնիտուդ: Միևնույն ժամանակահատվածում Հայաստանում, Իրանում, Ադրբեջանում և Վրաստանում գրանցվել են տարբեր ուժգնության ավելի քան 3000 երկրաշարժեր, որոնց թվում եղել են նաև մինչև 5 բալանոց երկրաշարժերը: Մասնագետները կարծում են, որ մոտ ապագայում ստորերկրյա ցնցումները կշարունակվեն:
