ԱՄՆ-ը տրամադրված է երկխոսել աֆղանական հարցում շահագրգիռ բոլոր կողմերի հետ` հասկանալով, որ դա հեշտ չի լինի։ Այս մասին հայտարարել է ԱՄՆ պետքարտուղար Հիլարի Քլինթոնը:
«Մենք շարունակում ենք աֆղաններին լիազորությունների փոխանցման գործընթացը, մենք կշարունակենք դա անել նշանակված ժամկետներում: Բայց դրանից հետո մենք չենք հեռանա Աֆղանստանից: Մենք մտադիր ենք երկխոսել, սակայն հասկանում ենք, որ դա հեշտ չի լինի, և մեզ դժվար ժամանակներ են սպասվում»,- հայտարարել է Քլինթոնը` ելույթ ունենալով Վիրջինիա նահանգի ռազմական ինստիտուտում:
Պետքարտուղարը նշել է, որ ամերիկյան զորքերն Աֆղանստանից դուրս կբերվեն 2014թ.: Նրա խոսքերով՝ Վաշինգտոնը զորքերի դուրս բերման ժամկետը փոխելու որևէ պատճառ չի տեսնում:
ԱՄՆ-ի և Աֆղանստանի հարաբերությունները լարվել են ամերիկացի զինծառայողների մասնակցությամբ մի շարք դեպքերից հետո: Մասնավորապես, փետրվար ամսին ամերիկացի զինծառայողները Բաղրամի բազայում այրել էին մի քանի կրոնական գրքեր, որոնց մեջ գտնվում էին նաև Ղուրանի օրինակներ: Որպես բողոքի նշան` Աֆղանստանում մի քանի օր շարունակ հակաարևմտյան ցույցեր են տեղի ունեցել: ԶԼՄ-ների տեղեկատվության համաձայն՝ այս ցույցերի ընթացքում մահացել է ավելի քան 30, վիրավորվել՝ առնվազն 260 մարդ:
