Մամուլում շրջանառվող լուրերը, թե Տիգրան Ուրիխանյանը առաջիկայում ինքնաբացարկ է հայտնելու ԲՀԿ համամասնական ընտրացուցակից, իրականությանը չեն համապատասխանում: «Առաջին լրատվական»-ի հետ զրույցում այս մասին ասաց ինքը՝ Ուրիխանյանը:
«Նման բաներ գրելու համար, հավանաբար, ինչ-որ մարդիկ ինչ-որ շահագրգռվածություններ ունեն: Լենինն ասում էր. Если что-то происходит, ищите того, кому это нужно:
Ինչպես երևում է՝ ինչ-որ մեկին պետք է: Բայց ես հիմա զբաղված եմ իմ մարդկային ռեսուրսին ուղղորդելով, կազմակերպելով նրանց հետ տարվող աշխատանքները, զբաղված եմ կուսակցական շինարարությամբ ու ծրագրային մտքեր գեներացնելով: Չեմ ուզում այս ամենին անդրադառնալ»,- ասաց Ուրիխանյանը:
Նշենք, որ «Ժողովուրդ»-ի տեղեկությունների համաձայն` ԲՀԿ համամասնական ընտրացուցակից առաջիկայում ինքնաբացարկ են հայտնելու Վահան Բաբայանն ու Տիգրան Ուրիխանյանը:
«Բանն այն է, որ նրանց ցուցակի առաջին 20 համարում են ընդգրկել` հույս ունենալով, որ կկարողանան լավ աշխատանք տանել` հօգուտ այս կուսակցության: Բայց նախընտրական քարոզարշավը դեռ չսկսված` արդեն իսկ ԲՀԿ-ում ներքին դժգոհություն կա այս երիտասարդների աշխատանքի, իսկ ավելի ճիշտ` չաշխատելու կապակցությամբ: Չի բացառվում, որ որոշակի սկանդալներից խուսափելու համար նրանք ինքնաբացարկ հայտնեն ոչ թե նախընտրական քարոզարշավի ժամանակ, այլ` ընտրություններից անմիջապես հետո` հրաժարվելով պատգամավորական մանդատներից»,- գրում է թերթը:
