Հայաստանի Հանրապետությունում սուր շնչառական վարակների, թոքաբորբերի առումով համաճարակային իրավիճակը համեմատաբար հանգիստ է: Այս մասին այօր մեզ հետ զրույցում տեղեկացրեց առողջապահության նախարար Հարություն Քուշկյանի մամլո խոսնակ Շուշան Հունանյանը։ Նրա խոսքերով, ներկայումս հանրապետության ողջ տարածքում իրականացվում է սուր շնչառական վարակների օրական մոնիտորինգ, որի տվյալներով` սուր շնչառական վարակներով հիվանդացությունը, 2009 թվականի նույն ժամանակահատվածի համեմատ, գտնվում է միևնույն մակարդակի վրա: Ինչ վերաբերում է շտապօգնության կանչերին, ապա պետք է նշել, որ տոնական օրերի համեմատ, ներկայումս սուր շնչառական վարակներով պայմանավորված կանչերը կազմում են ընդհանուր կանչերի միայն 10% -ը, 60-70%-ի փոխարեն: 2011 թվականին, 2010 թվականի միևնույն ժամանակահատվածի համեմատ, նվազել են հանրապետության հիվանդանոցներ հոսպիտալացված թոքաբորբերի դեպքերը: Վերակենդանացման բաժանմունքներ հոսպիտալացված թվով 9 թոքաբորբի դեպքերն ունեն առողջացման դրական ընթացք: Սկսած 2010 թվականի հոկտեմբերից` հանրապետության դպրոցներում և նախադպրոցական հիմնակներում իրականացվում է ջերմային ռեժիմի մոնիտորինգ: Պարզաբանվում են բացակայության պատճառները, իսկ հիվանդացության բարձրացման դեպքում իրականացվում են կանխարգելիչ միջոցառումներ: «Հետագայում համաճարակային իրավիճակի բարդություններից խուսափելու նպատակով ՀՀ առողջապահության նախարարության կողմից շարունակվում են սուր շնչառական վարակների կանխարգելման ուղղությամբ ձեռնարկված միջոցառումները: Իսկ գրիպով կամ սուր շնչառական վարակներից խուսափելու համար ցանկալի է խուսափել հիվանդների հետ շփումից, եթե հիվանդ եք, ապա մնացեք տանը,եթե հիվանդ եք, հրավիրեք տեղամասային մանկաբույժին, թերապևտին կամ ընտանեկան բժշկին։ Խորհուրդ է տրվում ինքնաբուժմամբ չզբաղվել։ Միաժամանակ հագնվել եղանակին համապատասխան,պահպանել հազի և կամ փռշտալու վարվելակարգը, օգտագործել հնարավորինս շատ հեղուկ, հաճախակի օդափոխել փակ տարածքները»,- առաջարկեց Շուշան Հունանյանը։