Ճապոնիայի «Ֆուկուսիմա 1» ատոմակայանում երկրորդ ռեակտորային բլոկում ռադիացիայի մակարդակը նորման գերազանցել 10 նագամ: Ինչպես հաղորդում է BBC-ն, վտանգավոր ճառագայթման մակարդակը բլոկում շատ ավելի բարձր է, քան կանխատեսվում էր: Բացի այդ, պարզվել է, որ ռեակտորի հովացման համար մղվող ջուրը չի բավականացնում, որի պատճառով այն գերտաք վիճակում է մնում:
Չնայած շրջակա տարածքներին առայժմ վտանգ չի սպառնում, մասնագետները խոստովանում են, որ ռեակտորի և մյուս սարքավորումների ապամոնտաժումը նոր ինֆորմացիայի ֆոնին շատ բարդ առաջադրանք կլինի: Բանն այն է, որ նման պայմաններում ոչ բոլոր սարքերը կարող են անխափան աշխատել: Այնտեղ մարդ ուղարկելու մասին խոսք անգամ չի կարող լինել:
Բացի այդ, մասնագետները մտավախություն ունեն, որ նոր երկրաշարժերը կամ ցունամիները կարող են վնասել ռեակտորների հովացման ժամանակավոր համակարգը, որը անկանխատեսելի հետևանքներ կունենա:
Ատոմակայանի օպերատոր ընկերության ներկայացուցիչը խոստովանել է, որ ռեակտորային բլոկների մյուս երկու ռեակտորներում դրությունը կարող է ավելի վատ լինել: Այնտեղ դեռևս զոնդ չի ուղարկվել, սակայն առաջիկայում նախատեսվում է:
Հիշեցնենք, որ «Ֆուկուսիմա 1» ատոմակայանը վթարի ենթարկվեց անցյալ տարվա մարտի 11-ին տեղի ունեցած ուժեղ երկրաշարժի և դրան հաջորդած ցունամիի հետևանքով, ապա տեղի ունեցավ ռադիացիայի արտահոսք: Ավելի ուշ միացվեց ռեակտորների հովացման ժամանակավոր համակարգ, որը թույլ տվեց խուսափել չեռնոբիլյան սցենարի կրկնությունից:
