Մալիի ռազմական հեղաշրջումը գլխավորած կապիտան Ամադու Սանոգոն հայտարարել է, որ չի պատրաստվում մնալ իշխանության ղեկավար: Նրա խոսքերով՝ ինքը ցած կդնի իր լիազորությունները, երբ բանակը ճնշի տուարեգների ապստամբությունը և երկրում անվտանգություն ապահովի:
Ինչպես հաղորդում է BBC-ն, Սանոգոն հայտարարել է, որ նախագահական նոր ընտրություններից հետո ինքը և իր համախոհները շատ ուրախ կլինեն վերադառնալ զորամաս: Նա նաև հավաստիացրել է, որ իրենք չեն ցանկանում ոչ ոքի վնաս պատճառել:
Մալիի օրինական նախագահի գտնվելու վայրը հայտնի չէ: Կցկտուր տեղեկություններով՝ նա իրեն հավատարիմ էլիտար գվարդիայի հետ թաքնվում է մայրաքաղաք Բամակոյից ոչ հեռու:
Պետական հեղաշրջումից հետո Աֆրիկյան միությունը կասեցրել է Մալիի անդամակցությունը: Կատարվածը դատապարտել են նաև Եվրամիությունը՝ ժամանակավորապես դադարեցնելով այդ երկրի հետ բոլոր նախագծերը:
Հիշեցնենք, մարտի 21-ին Մալիի բանակի զինծառայողները գրավեցին նախագահական պալատը: Ավելի ուշ ազգային հեռուստատեսությամբ հնչեց նրանց հայտարարությունը: Պարզվեց, որ ապստամբների դժգոհության պատճառը եղել է իշխանությունների ոչ ադեկվատ քայլերը Մալիի հյուսիսում տուարեգների ապստամբական գործողությունների նկատմամբ:
Երկրում իշխանությունն անցել է, այսպես կոչված, Ժողովրդավարության վերականգնման և պետության վերստեղծման ազգային կոմիտեին՝ կապիտան Ամադ Սանոգոյի գլխավորությամբ: Կոմիտեն ցրել է կառավարությունը, կասեցրել սահմանադրության գործունեությունը և ձերբակալել մի քանի նախարարների:
