2009 թ. Իսրայելի համար լրտեսություն կատարելու մեղադրանքով FBI-ի կողմից ձերբակալված ամերիկացի գիտնական Ստյուարտ Դևիդ Նոզեթը դատապարտվել է 13 տարվա ազատազրկման,- հաղորդում է The Washington Times թերթը:
Բացի այդ, դատարանի որոշմամբ՝ Նոզեթը պետք է 217 հազար դոլարի չափով փոխհատուցում վճարի պետական հաստատություններին, որոնց փակ տեղեկատվությունը նա պատրաստվում էր տրամդրել իսրայելական հետախուզությանը:
«Ստյուարտ Նոզեթի ժլատությունն ավելին է եղել, քան մեր երկրի հանդեպ ունեցած լոյալությունը: Նա վատնել է իր տաղանդը և կործանել իր հեղինակությունը ՝ համաձայնվելով վաճառել պետական գաղտնիքը ինչ-որ մեկին, որին նա համարում էր օտարերկրյա գործակալ: Ժամանակը, որ նա կանցկացնի բանտում, նրան հնարավորություն կտա մտածել Ամերիկայի Միացյալ Նահանգներին դավաճանելու իր որոշման շուրջ»,- հայտարարել է դաշնային դատախազ Ռոնալդ Մեյչեն-Կրտսերը:
Դատապարտյալի մեկնաբանությունները թերթը չի բերում:
Գիտնականին նման հանցագործության համար մեղադրելու հիմք են հանդիսացել մի շարք փաստաթղթեր, որոնց համաձայն՝ ձերբակալվածը 2009 թ. սեպտեմբերի 3-ին հեռախոսով կապվել և պայմանավորվել է հանդիպել ենթադրյալ իսրայելցի հատուկ ծառայության աշխատակցի հետ, որն իրականում եղել է FBI-ի գործակալ: Հանդիպմանը Նոզեթը պատրաստակամություն է հայտնել աշխատել իսրայելական հետախուզության հետ և համաձայնություն է ձեռք բերել վարձատրման շուրջ:
2009 թ. սեպտեմբերին FBI-ը նրան ուղարկել է 2000 դոլար առձեռն աշխատավարձ, որից հետո պարբերաբար տեսագրել է Նոզեթի բոլոր գործողությունները:
Հետաքննության փաստաթղթերի համաձայն՝ Նոզեթը 1983 թ. Մասաչուսեթսի տեխնոլոգիական համալսարանում գիտական աստիճան է ստացել աստղագիտության ոլորտում, որից հետո 1989-1990 թթ. աշխատել է Սպիտակ տանը՝ որպես տիեզերական հետազոտությունների հարցերով օգնական: Նոզեթը, հնարավոր է, մասնակցել է Լուսնի Հարավային բևեռում ջրի որոնման աշխատանքներին: Աշխատելով էներգետիկայի նախարարությունում՝ նա մատչւմ է ունեցել միջուկային և սպառազինության գաղտնի նյութերին:
