Թուլուզում և նրա շրջակայքում 7 մարդու սպանության մեջ կասկածվող տղամարդուն ճանաչել է Աֆղանստանի Քանդահար քաղաքի բանտի պետը, հաղորդում է Reuters-ը: Նրա խոսքերով՝ Մուհամմադ Մերան եղել է իրենց բանտի դատապարտյալներից մեկը, որին հաջողվել է փախչել:
Բանտի պետը պատմել է, որ Մերան ձերբակալվել է 2007թ. ահաբեկչություն նախապատրաստելու կասկածանքով: Նրան դատապարտել են 3 տարվա ազատազրկման, սակայն 2008թ. նա մի խումբ թալիբների հետ փախուստի է դիմել: Չի հաղորդվում՝ արդյո՞ք Մերայի նկատմամբ միջազգային հետախուզում է հայտարարվել:
Ավելի վաղ հաղորդվում էր, որ Մուհամմադ Մերան ալժիրյան ծագմամբ ֆրանսիացի է: Իրեն նա անվանում է «Ալ-Քաիդա»-ի զինյալ: Մերայի խոսքերով՝ ինքը վրեժ է լուծել մուսուլմանական երկրներում ֆրանսիական զորքերի առկայության, ինչպես նաև պաղեստինա-իսրայելական հակամարտության ժամանակ զոհված պաղեստինցի երեխաների համար:
Մարտի 21-ի գիշերը ոստիկանները հատուկ գործողություն իրականացնելու նպատակով շրջափակեցին այն տունը, որտեղ թաքնվում էր Մերան: Փոխհրաձգության ընթացքում վիրավորվեցին իրավապահ մարմինների երեք աշխատակիցներ: Դեպքի վայր էր բերվել նաև երիտասարդի մայրը, սակայն նա հրաժարվեց բանակցել որդու հետ՝ պատճառաբանելով, որ ոչ մի ազդեցություն չունի նրա վրա: Այնուամենայնիվ, Մերան խոստացավ օրվա ընթացքում հանձնվել: Միաժամանակ, BBC-ն իր բլոգում, վկայակոչելով որոշ ֆրանսիական ԶԼՄ-ներ, գրում է, որ ահաբեկիչը նախընտրում է զոհվել:
Հիշեցնենք. երկուշաբթի 24-ամյա երիտասարդը անկանոն կրակ էր բացել Թուլուզի հրեական դպրոցի մոտ հավաքված ծնողների և երեխաների վրա, որի հետևանքով զոհվել էր 3 երեխա և մեկ ուսուցիչ:
Անցյալ շաբաթ Թուլուզում ևս երկու նման սպանություն էր կատարվել, երբ նույն մոտոցիկլետով տղամարդը սպանել էր երեք դեսանտայինների: Իսկ կիրակի ենթադրաբար նույն մարդը Թուլուզի բնակելի թաղամասերից մեկում սպանել էր 30-ամյա մի զինվորի:
