«Սահմանադրական նորմին համաձայն՝ եթե վիճելի հարց է ծագում, կարելի է դատական կարգով լուծել: Բայց բոլորս էլ հասկանում ենք, որ դա ջրի վրա գրված բան է: Որպես կանոն մեր դատական համակարգը, ըստ էության, ի՞նչ է անում՝ ով իրեն ավելի լավ է պահում, դրա օգտին է հարցերը լուծում»,- այսօր ԱԺ նիստում հայտարարեց ԲՀԿ պատգամավոր, ԱԺ տնտեսական հարցերով մշտական հանձնաժողովի փոխնախագահ Վարդան Բոստանջյանը՝ Տնտեսական մրցակցության պաշտպանության պետական հանձնաժողովի 2012 թ. ծրագրի քննարկման ժամանակ:
Նրա խոսքով, այդ առումով ՏՄՊՊՀ-ն խոցելի վիճակում է գտնվել, և միայն վերջին տարում «դատական համակարգը եկել է կամ դրան բերել են այն բանին, որ միայն անձնական շահագրգռվածության ռեժիմում չի կարելի խաթարել տնտեսական մրցակցությանը»:
Ի դեպ, Վ.Բոստանջյանի բնորոշմամբ՝ հասկացող մարդու զարմանք է գալիս, թե ինչու՞ է ՏՄՊՊՀ աշխատակիցների վարձատրությունը Հանրային ծառայությունները կարգավորող հանձնաժողովից 2 անգամ պակաս գնահատվում: