ԱՄՆ նախագահ Բարաք Օբաման դիմել է երկրի գործարար շրջանակներին՝ խնդրելով օգնել համոզելու կոնգրեսականներին՝ չեղյալ համարել Ջեքսոն-Վեննիկի ուղղումը և Ռուսաստանին տրամադրել առևտրական գործընկերոջ մշտական կարգավիճակ:
Ինչպես հաղորդում է ITAR-TASS-ը, ելույթ ունենալով 100 խոշոր արդյունաբերական և ֆինանսական կորպորացիների ղեկավարների հետ հանդիպմանը՝ Օբաման նշել է, թե իր կարծիքով՝ «ինքն արդեն ցույց է տվել, որ պատրաստ է գնալ աշխարհի ցանկացած կետ՝ ամերիկյան առևտրի համար նոր կետեր բացելու համար»:
«Հենց այդ պատճառով մենք այդքան քրտնաջան աշխատում էինք՝ ապահովելու համար Ռուսաստանի անդամակցությունը Առևտրի համաշխարհային կազմակերպությանը,- ասել է Օբաաման:- Հենց դրա համար ես խնդրել եմ Կոնգրեսին չեղյալ համարել Ջեքսոն-Վեննիկի ուղղումը: Դա անհրաժեշտ է, որպեսզի ամերիկյան բոլոր ընկերությունները կարողանան օգտվել այն առավելությունից, որը տալիս է Ռուսաստանի անդամակցությունը ԱՀԿ-ին: Եվ այդ հարցում մենք (վարչակազմը.- 1in.am) ձեզնից որոշակի օգնություն ենք խնդրում»,- ասել է Օբաման:
Ջեքսոն-Վեննիկի ուղղումն ընդունվել է ԱՄՆ-ում 1974 թ. և նախատեսում է սահմանափակել առևտուրը մի շարք երկրների հետ, որոնք արգելում են իրենց քաղաքացիների մուտքը ԱՄՆ: Դա առաջին հերթին վերաբերում էր ԽՍՀՄ-ին: Սահմանափակումներով մասնավորապես նախատեսվում էր հատուկ հարկ սահմանել ԱՄՆ-ից ներմուծվող ապրանքների վրա:
ԽՍՀՄ փլուզումից հետո ԱՄՆ-ը չեղյալ համարեց այդ ուղղումը մի շարք նախկին խորհրդային հանրապետությունների նկատմամբ, սակայն Ռուսաստանի դեպքում մինչ օրս այն գործում է: ԱՄՆ նախագահն ամեն տարի կասեցնում է այն ռուս-ամերիկյան առևտրական հարաբերություններին չվնասելու համար:
