«Կապ չունի՝ գրողը երիտասարդ է, թե տարիքով, Հայաստանում այսօր գրական դաշտի խնդիրներն ընդհանուր են»,- «Առաջին լրատվական»-ի հետ զրույցում ասաց գրող Կարեն Անտաշյանը: Նա նշեց, որ երիտասարդ գրողներն ավելի մեծ շանսեր ունեն ընթերցվելու, քանի որ տիրապետում են սոցիալական մեդիայի գործիքներին. «Սոցիալական մեդիայի շնորհիվ ավելի հեշտ ու արագ կարող են երիտասարդները կապ ստեղծել և ընթերցողների փոքրիկ լսարան ձևավորել իրենց շուրջը, ինչը չի կարելի ասել նույնիսկ շատ տաղանդավոր գրողների մասին, որոնք հաղորդակցության բացակայության պայմաններում չեն կարողանում գտնել իրենց ընթերցողներին:
Խոսելով լեզվական խնդիրների մասին՝ Կարեն Անտաշյանն առանձնացրեց երկու խնդիր՝ լեզվի պահպանության խնդիր և լեզվի զարգացման խնդիր. «Լեզվի զարգացման և պահպանման հիմնական խնդիրը առկա է ժամանակակից գրականության մեջ, որովհետև լավ գրականությունը ինքնին լեզվական խաղ է, անհնար է ստեղծել լավ գրականություն՝ առանց լեզվի ընդունված չափանիշները վերանայելու»:
Ըստ գրողի՝ որոշ հեղինակներ ժարգոնից մինչև ծայրահեղ մաքրամաքուր, ոսկեղենիկ, անկենդան լեզու են օգտագործում իրենց ստեղծագործություններում, ինչը, իհարկե, առաջին հերթին գրողի խնդիրն է, սակայն նաև նոր լիցք է տալիս գրականությանը:
