Ուկրաինայի նախագահ Վիկտոր Յանուկովիչը խոսել է նախկին վարչապետ Յուլյա Տիմոշենկոյին ներում շնորհելու մասին: Ինչպես, 3 ուկրաինական հեռուստաալիքներին տված հարցազրույցում ասել է Յանուկովիչը, ներման գործընթացը կարող է սկսվել դատավարության ավարտից հետո և նախկին վարչապետի՝ նախագահին ուղղված համապատասխան դիմումի դեպքում։ Այս մասին հաղորդում է Интерфакс-ը:
«Հետո կարող է ներում շնորհվել: Ներման գործընթացը ևս նախատեսված է օրենսդրությամբ: Եվ ես ուզում եմ ասել, որ եթե այդ գործընթացը լինի, ապա այն կսկսվի դատապարտված մարդու` նախագահին ուղղված դիմումով: Նախագահն ունի հանձնաժողով, որը քննարկում է ներում շնորհելու հարցը»,- ասել է նախագահը:
Հիշեցնենք, որ Կիևի Պեչորյան շրջանային դատարանը 2011 թվականի հոկտեմբերի 11-ին Տիմոշենկոյին 7 տարվա ազատազրկման է դատապարտել` 2009 թվականին Ռուսաստանի հետ գազի պայմանագրի ստորագրման ժամանակ իր լիազորությունները չարաշահելու համար:
