Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանը` դատավոր Ռուբեն Ներսիսյանի նախագահությամբ այսօր հետաձգեց «Վանաձոր» ՔԿՀ-ում բժշկի կողմից իր մասնագիտական պարտականությունները ոչ պատշաճ կատարելու հետևանքով մահացած Սլավիկ Ոսկանյանի իրավահաջորդի ներկայացուցիչներ Էդմոն Մարուքյանի և Կ. Թումանյանի կողմից բերված բողոքի քննությունը: Դատարան ոչ միայն չէր եկել ՀՀ Հատուկ քննչական ծառայության քննիչը, դրա հետ մեկտեղ պարզվեց, որ մինչ օրս դատարան չեն ուղարկվել անգամ գործի նյութերը:
Դատական նիստերի քարտուղարը զեկուցեց, որ ՀՔԾ-ից զանգել են և տեղեկացրել, որ քննիչը 3 օր է հիվանդ է, իսկ քանի որ գործի նյութերը գտնվում են նրա չհրկիզվող պահարանի մեջ, դրանք դատարանին կրկին չեն կարողացել ներկայացնել: «Բնականաբար, քանի որ գործի նյութերը չկան, դատարանն առանց դրանց չի կարող ստուգել որոշման օրինականությունը: Սակայն մոտ մեկ ամիս է ՀՔԾ-ից դատարանը պահանջել է գործի նյութերը, և ՀՔԾ-ն դատարանին չի տրամադրում դրանք, դատարանի որոշումն ըստ էության չի կատարում: Եթե քննիչը երեք օր է հիվանդ է, նյութերը մեկ ամիս է ուզել են, 3 օր հիվանդանալն ի՞նչ պատճառաբանություն է»,- «Առաջին լրատվական»-ի հետ զրույցում նշեց փաստաբան Էդմոն Մարուքյանը:
Նշենք, որ Հատուկ քննչական ծառայության ներկայացուցիչը ոչ միայն այս, այլ նաև այս գործով նախորդ նիստին չէր ներկայացել: Հիշեցնենք, որ Սլավիկ Ոսկանյանի իրավահաջորդի ներկայացուցիչները պահանջում են վերացնել ՀՀ հատուկ քննչական ծառայության ՀԿԳ ավագ քննիչի կողմից քրեական գործի վարույթը կարճելու և քրեական հետապնդում չիրականացնելու մասին որոշումը: Գործի էությունն այն է, որ 2010 թ. դեկտեմբերի 30-ին ՀՀ ոստիկանության Լոռու մարզի քննչական բաժնում հարուցվել է քրեական գործ այն առիթով, որ «Վանաձոր» ՔԿՀ-ի կալանավոր Սլավիկ Ոսկանյանը 2010 թ. հոկտեմբերի 18-ին դիմել է նույն ՔԿՀ-ի բուժական մաս և «Վանաձոր» ՔԿՀ-ի բժիշկ Մարզպետ Մինասյանի կողմից ստացել համապատասխան բուժում, սակայն 2010 թ. հոկտեմբերի 24-ին մահացել է:
Սլավիկ Ոսկանյանի գործը Հելսինկյան քաղաքացիական ասամբլեայի Վանաձորի գրասենյակի կողմից նախաձեռնված ռազմավարական դատավարություններից մեկն է: Գրասենյակից հիշեցնում են, որ Human Rights Watche-ն իր 2011 թ. զեկույցի «Մահացության դեպքեր կալանավայրերում» բաժնում անդրադարձել է նաև Սլավիկ Ոսկանյանի գործին:
Այսօրվա նիստը հետաձգվեց մինչև մարտի 6-ը, ժամը 16:00, սակայն որևէ վստահություն չկա, որ հաջորդ նիստին գործի նյութերը դատարանում կլինեն:
Հիշեցնենք, որ նախորդ դատական նիստը ևս նույն պատճառաբանությամբ էր հետաձգվել:
