1904թ. այս օրը Թիֆլիսում ծնվեց անվանի ֆիզիկոս, ֆիզիկամաթեմատիկական գիտությունների դոկտոր, պրոֆեսոր (1937թ.), ԽՍՀՄ ԳԱ (1943թ.), ՀՊՍՀ ԳԱ ակադեմիկոս (194 թ.), ԽՍՀՄ պետական մրցանակների դափնեկիր (1941թ., 1948թ., 1953թ.) Աբրահամ Ալիխանովը՝ Արտեմ Ալիխանյանի եղբայրը:
Ծնվել է Թիֆլիսում, ավարտել Լենինգրադի պոլիտեխնիկական ինստիտուտը (1929թ.), 1929-1941թթ. աշխատել է ԽՍՀՄ ԳԱ ֆիզիկատեխնիկական ինստիտուտում, զբաղվել ռենտգենակառուցվածքային վերլուծության և ռենտգենյան ճառագայթների ֆիզիկայով։ 1934-ից ուսումնասիրել է ռադիոակտիվությունը և ռադիոակտիվ ճառագայթումը, Արտեմ Ալիխանյանի և Մ. Կոզադաևի հետ հայտնաբերել և ուսումնասիրել է գրգռված միջուկներից էլեկտրոն-պոզիտրոն զույգերի առաքման երևույթը։
1935թ. Ա. Ալիխանյանի հետ սահմանել է b սպեկտրների կախումը տարրի ատոմական կարգաթվից և ճշգրտել Ռեզերֆորդի ստացած որոշ արդյունքներ։ 1936-ին Ալիխանյանի և Լ. Արցիմովիչի հետ փորձով հիմնավորել է իմպուլսի պահպանման օրենքը էլեկտրոն-պոզիտրոն զույգերի անիհլացման ժամանակ։
1940թ. Ալիխանովը կազմակերպել է Էլբրուսի տիեզերական ճառագայթների հետազոտման առաջին արշավախումբը և ապացուցել էլեկտրոնների ու ֆոտոնների` մասնիկների հեղեղներ առաջացնելու նույնությունը։
1943-ին Ալիխանյանի հետ ստեղծած Արագածի տիեզերական հետազոտման կայանում (3200 մ բարձրության վրա) զբաղվել է տիեզերական ճառագայթների ուսումնասիրությամբ, որոնց արդյունքները խթանեցին տարրական գիզիկայի զարգացումը։ 1949-ին աշխատակիցների հետ ստեղծել է ծանր ջրային դանդաղեցուցիչով ԽՍՀՄ-ում առաջին միջուկային ռեակտորը։
Ալիխանովը միջուկային ֆիզիկայի խորհրդային դպրոցի և ԽՍՀՄ-ում տարրական մասնիկների արագացուցիչների ստեղծողներից է։ 1961թ. նրա նախաձեռնությամբ և ղեկավարությամբ սկսվել է Մոսկվայի` 7 ԳԷՎ էներգիայով պրոտոնների կոշտ կիզակետմամբ արագացուցիչի կառուցումը, նախագծվել նաև 70 ԳԷՎ էներգի:այով պրոտոնային արագացուցիչը:
Մահացել է 1970թ. դեկտեմբերի 8-ին: