Ինչպես հաղորդում է vesti.az-ը, Թուրքիայի վարչապետ Էրդողանը քննադատել է ամերիկացի գրող Պոլ Օսթերին, որը հայտարարել է Թուրքիան բոյկոտելու մտադրության մասին:
Էրդողանին դուր չի եկել այն փաստը, որ Օսթերը չի բոյկոտել Իսրայելը. «Դու ոչինչ չգիտես, ու դու հիմար ես: Քեզ թվում է, թե Իսրայելը դեմոկրատական երկիր է, որտեղ ազատ խոսքի իրավունք ու անհատի ազատություն գոյություն ունի, իսկ իրականում ռմբակոծում են Գազան, կիրառում են ֆոսֆորային ռումբեր ու քիմիական զենք»,- ասել է Թուրքիայի վարչապետը:
«Եթե մարդը, որը կույր է ու չի նկատում իր քթի տակ կատարվածը և մեզ բոյկոտ է հայտարարում, դա շատ լուրջ ու անհարգալից դրսևորում է Թուրքիայի հանդեպ»,- հավելել է Էրդողանը:
«Ո՞ւմ է ընդհանրապես հետաքրքրում` կգաս դու մեզ մոտ, թե չէ: Եվ, ընդհանրապես, ով գիտի, թե դու ով ես»,- հայտարարել է Էրդողանը Անկարայում բուռն ծափողջույնների ներքո:
Այդ կերպ է թուրք վարչապետն արձագանքել թուրքական մամուլին Օսթերի տված հարցազրույցին, որտեղ գրողը հայտարարել է, որ ինքը ոչ մի դեպքում չի գնա Թուրքիա կամ Չինաստան, քանի դեռ այնտեղ ճաղերի ետևում այդքան շատ լրագրողներ ու գրողներ կան:
Պոլ Օսթերը ճանաչված ամերիկացի գրող է, սցենարիստ ու թարգմանիչ:
