Ադրբեջանական ANS PRESS-ին տված հարցազրույցի ժամանակ Ադրբեջանի Հանրապետության պետական նավթային ընկերության (SOCAR) նախագահ Ռովնագ Աբդուլաևը հայտարարել է, որ «Անդրանատոլիական» գազամուղը Ադրբեջանի ապագան է.
«Ադրբեջանական «Շահ Դենիզ 2» նախագծի կյանքի կոչման դեպքում Ադրբեջանից Թուրքիա տարեկան կարտահանվի 16 միլիարդ խորանարդ մետր գազ, որից 6 միլիարդ խորանարդ մետրը հատկացվելու է Թուրքիային, իսկ 10 միլիարդը կարտահանվի դեպի Եվրոպա։
Սկզբնական շրջանում մենք մտածում էինք այդչափ գազ մատակարարել Թուրքիայի գործող ենթակառույցների միջոցով, սակայն հասկացանք, որ հետագայում դա կարող է լուրջ խնդիրներ հարուցել։ Դրա համար էլ Ադրբեջանն ու Թուրքիան համաձայնության եկան թուրքական տարածքում նոր գազատարի կառուցման շուրջ։
Դրա շնորհիվ մեր գազն անարգել կհասնի Եվրոպա, ինչը մեր առջև կբացի նոր ռազմավարական հարաբերություններ։ Մենք արդեն մեր գազը վրացական սահման ենք հասցնում ոչ թե ցիստեռներով, այլ գազատարով։ Ես ռազմավարական կարևոր գործոն եմ համարում այն, որ մենք թուրքական տարածքով Եվրոպային գազ ենք մատակարարելու մեր սեփական խողովակաշարով։
Դրա 80 տոկոսը պատկանում է SOCAR-ին, իսկ 20 տոկոսը՝ թուրքական BOTAŞ և TPAO-ին։ Բացի այդ, գազատարը կբերի մեծ շահույթ։ Այս գազատարի կառուցման հետ մեկտեղ, մենք դիտարկում ենք մյուս նախագծերի իրագործման հարցը։ Դա մասնավորապես վերաբերում է Nabucco գազատարի կառուցմանը։ Մենք պետք է այնպես աշխատենք, որ «Անդրանատոլիական» գազամուղի կառուցումն ավարտված լինի մինչև 2017 թվականը, քանի որ այդ ժամանակ մեկնարկելու է «Շահ Դենիզ»-ի մշակման երկրորդ փուլը»։
