Կալիֆոռնիայի Լոս Անջելես քաղաքը կրել է 2.3 միլիոն դոլարի վնաս «Գրավե՛ք Ուոլ Սթրիթը» շարժման մասնակիցների երկու ամսվա ցուցերի հետևանքով: Այս մասին հայտնում է Assosiated Press գործակալությունը՝ հղում կատարելով քաղաքային ղեկավարությանը:
Քաղաքային իշխանությունները պահանջել են ներկայացնել տարբեր վարչությունների կրած վնասների հաշվետվություն` կապված երկու շաբաթ առաջ տեղի ունեցած ցույցերի հետ: Քաղաքային վարչության ներկայացուցիչ Միգել Սանտանան հայտնել է, որ ուրբաթ օրը ամփոփվել են ծախսերի նախնական տվյալները: Նա նշել է, որ ծախսերի նախնական գումարի մեջ չի մտնում 400 հազար դոլարը, որը քաղաքային իշխանությունը հատկացնելու է քաղաքային խորհրդի շենքի մոտ գտնվող զբոսայգու վերականգնման համար, որտեղ վրանային ճամբար էին հիմնել «օկուպանտները»:
Ոստիկանությանը ուժեղացված հերթապահության համար քաղաքային բյուջեից հատկացվել է 1,6 միլիոն դոլար:
Լոս Անջելեսի իշխանությունները դեկտեմբերի սկզբին հայտարարել էին «Գրավե՛ք Ուոլ Սթրիթը» շարժման մասնակիցների վրանային ճամբարը հանելու մասին, որը Լոս Անջելեսի ցուցարարները հիմնել էին հոկտեմբերի 1-ին:
Հիշեցնենք, որ «Գրավեք Ուոլ Սթրիթը» շարժումը սկսվել է Նյու Յորքում՝ սեպտեմբերի 17-ին: Ակցիայի մասնակիցները բողոքում էին ֆինանսական ինստիտուտների և սոցիալական անհավասարության դեմ:
