Մինչ կոնգրեսական Ադամ Շիֆն իր գործընկերների և Կոնգրեսի առաջնորդների հետ շարունակում է աշխատել 252-րդ բանաձևը քվեարկության դնելու ուղղությամբ, թուրքական խմբի համանախագահները Կոնգրեսի հեռացող անդամ Վիլյամ Դելահանթի հետ տարածեցին «Հարգելի գործընկեր» նամակը՝ ընդդեմ այս երկկուսակցական բանաձևի. Հաղորդում է Ամերիկայի հայկական համագումարը (Համագումար):
«Հարգելի գործընկեր» նամակը թվարկում է բանաձևի դեմ մի շարք անիմաստ պատճառներ` ներառյալ «մեր ազգային անվտանգությունը Կովկասում, Բալկաններում, Մերձավոր Արևելքում և Կենտրոնական Ասիայում վտանգելու պոտենցիալը», ինչպես նաև այն, որ հնարավոր է՝ վնասվի «Թուրքիայի և Իսրայելի միջև հարաբերությունների վերականգման ուղղությամբ տարվող բանակցությունների ընթացքը»: Նամակը նաև նշում է, որ Թուրքիայի հետ համագործակցությունը «անկումից» կփրկի Միացյալ Նահանգների տնտեսությունը:
«Այս նամակը անտեսում է իրական իմաստը»,- նշում է Համագումարի գործադիր տնօրեն Բրայան Արդունին: «Բանաձևը ո՛չ Թուրքիայի մասին է, ո՛չ Աֆղանստանում դպրոցներ կառուցելու, ո՛չ էլ վերաբերում է Բալկաններին, Կովկասին, Միջին Արևելքին, Կենտրոնական Ասիային ու Միացյալ Նահանգների տնտեսությանը: Այս բանաձևը, որի կողմնակիցներն են եղել սենատորներ Բարաք Օբաման, Ջո Բիդենը և Հիլարի Քլինթոնը, վերաբերում է ամերիկյան արժեքներին»,- ասում է Արդունին:
