Ռուսական Regnum լրատվական գործակալության փոխանցմամբ՝ տնտեսական համագործակցության գծով վրաց-ադրբեջանական միջկառավարական հանձնաժողովի 7-րդ նստաշրջանը տեղի է ունենալու դեկտեմբերի 20-ին Թբիլիսիում։ Այս մասին այսօր տեղի ունեցած ճեպազրույցի ժամանակ հայտարարել է Վրաստանի փոխարտգործնախարար Նինո Կալանդաձեն։
Վերջինիս խոսքերով՝ նիստի օրակարգում են լինելու էներգետիկայի, գյուղատնտեսության, տրանսպորտի, շրջակա միջավայրի պաշտպանության և տեղեկատվական տեխնոլոգիաների ոլորտում համագործակցությանն առնչվող խնդիրները։
Նշվում է, որ Ադրբեջանն ընդգրկված է Վրաստանի խոշորագույն առևտրային գործընկերների եռյակում։
Հիշեցնենք, որ տնտեսական համագործակցության գծով վրաց-ադրբեջանական միջկառավարական հանձնաժողովի նախորդ նստաշրջանը տեղի է ունեցել 2010 թվականի հուլիսին Բաքվում։
