Այսօր կառավարությունը քննարկել է «Գաղտնազերծման (լյուստրացիայի) մասին» և ևս հինգ օրենքներում լրացում կատարելու օրենսդրական նախաձեռնությունը, որով հանդես են եկել Ազգային ժողովի մի խումբ պատգամավորներ։ Գործադիրը հանգել է եզրակացության, որ խնդիրն արդիական չէ, ներկայացված օրենքների նախագծերի ընդունման անհրաժեշտություն չկա։
«Անկախանալուց հետո Մերձբալթյան երկրները և Վրաստանը համարել են, որ իրենք բռնազավթվել են Խորհրդային Միության կողմից և դրանով է պայմանավորված, որ նման օրինագիծ ընդունել են: Եթե համարում ես, որ այդ պետության իրավահաջորդ ես, ապա ընդունում ես, որ այդ օրենքների շրջանակներում այդ անձինք որևէ ոչ իրավաչափ գործողություն չեն կատարել»,- ասաց արդարադատության նախարար Հրայր Թովմասյանը:
ՀՀ կառավարությունը հավանություն է տվել ՀՀ քրեական օրենսգրքում փոփոխություններ և լրացում կատարելու օրենքի նախագծին, որի նպատակն է օրենսգրքում արտացոլել «Ճանապարհային երթևեկության անվտանգության ապահովման մասին» ՀՀ օրենքի դրույթները։
Նիստում հավանության է արժանացել «Առանց ծնողական խնամքի մնացած երեխաների սոցիալական պաշտպանության մասին» ՀՀ օրենքում լրացում կատարելու օրինագիծը, որտեղ որպես իրավական հիմք ամրագրվում է խնամակալության և հոգաբարձության մարմինների, առանց ծնողական խնամքի մնացած, բնակարանի կարիք ունեցող անձանց բնակարանի տրամադրման համար իրականացվող հաշվառման գործընթացը։
Վերը նշված օրենքների նախագծերը և կառավարության եզրակացությունը սահմանված կարգով կներկայացվեն ՀՀ Ազգային ժողով։
