Մենք շատ լավ ենք աշխատել, կարծում եմ: Համենայնդեպս, ունեցել ենք պահեր, որ գոհ ենք եղել համերգներից: Մենք շատ քննադատաբար ենք վերաբերվում մեր քայլերին, ունեցել ենք պահեր, որ ստեղծագործական առումով բավարարված ենք եղել մեզնից: Ամփոփելով անցնող տարին` ասաց Հայաստանի պետական ֆիլհարմոնիկ նվագախմբի գեղարվեստական ղեկավար ու գլխավոր դիրիժոր Էդուարդ Թոփչյանը:
Լրագրողների հետ հանդիպմանը դիրիժորն ուրախությամբ տեղեկացրեց, որ երկու օր առաջ ուրախալի լուր է ստացել Իսպանիայի սիմֆոնիկ նվագախմբերից մեկից ու հունվարից որպես գլխավոր դիրիժոր կղեկավարի նվագախումբը:
«Ցավոք սրտի, ավելի քիչ պետք է լինեմ Հայաստանում, բայց ուզում եմ շարունակել Ֆիլհարմոնիկի հետ: Իմ երազն այն է, որ կարողանամ մոտ ապագայում այն տեսնել աշխարհի ամենալավ նվագախմբերից մեկը» – ասաց նա`ընդգծելով, որ պատրաստվում է որոշ քայլեր կատարել ու դիմել համապատասխան մարմիններին:
Ինչ վերաբերում է հաջորդ տարի Ֆիլհարմոնիկի համերգներին, ապա դիրիժորը նկատեց, որ այն 2012 թ. համերգներով հանդես կգա Դուբայում, հոկտեմբերին ու նոյեմբերին` Եվրոպայում` Գերմանիա, Ավստրիա, Իսպանիա, Իտալիա:
Նրա խոսքով, սկսել են աշխատանքներ տարվել Ֆիլհարմոնիկը Կորեա, Չինաստան ու Ճապոնիա տանելու ուղղությամբ:
