Եվրոպական ժողովրդական կուսակցությանը Հայաստանի կուսակցությունների անդամակցությունն իսկապես հետաքրքիր պատմություն ստացվեց: ԵԺԿ-ում որոշեցին «չնկատել» ԲՀԿ-ին և ընդունել առայժմ միայն ՀՀԿ, ՕԵԿ, «Ժառանգություն» եռյակին:
Փաստորեն, ԲՀԿ-ին ոչ միայն Հայաստանում, այլ նույնիսկ Եվրոպայում են մերժում: Ի՞նչը կամ ո՞վ է սրա պատճառը: Ինչո՞ւ Եվրոպան որոշեց մերժել ԲՀԿ-ին: Արդյոք դա պայմանավորված էր Հայաստանի ներքաղաքական իրողություններո՞վ, թե՞ նրանով, որ այդ կուսակցությանը ԵԺԿ-ում ավելի շատ ռուսական ուղեծրի կուսակցություն են համարում կամ ընդհանրապես չեն համարում կուսակցություն և այդ իսկ պատճառով էլ մերժում են ԵԺԿ-ին անդամակցությունը: Նաև այս հանգամանքը հետաքրքրական է նրանով, որ ԵԺԿ ղեկավարությունը, փաստորեն, Հայաստանի կոալիցիոն կուսակցությունների եռյակին այլ կերպ է նայում և ընկալում: ԲՀԿ-ին, փաստորեն, ընկալում է այդ եռյակից դուրս:
Սակայն, մյուս կողմից, նաև հնարավոր է, որ ընդհանրապես Հայաստանի քաղաքական ուժերը որպես եռյակ չեն էլ ընկալվում, այլ դիտվում են, այսպես ասած, ՀՀԿ-ՕԵԿ միասնություն, ԲՀԿ-ն` առանձին և «Ժառանգությունն»` առանձին: Այսինքն` եթե ընդունում են ՀՀԿ-ին, ուրեմն ՕԵԿ-ին էլ ինքնաբերաբար, բայց ԲՀԿ-ին արդեն դիտարկում են այդ միասնությունից անկախ և չեն ընդունում: Ըստ որում` «Բարգավաճ Հայաստանի» հանդեպ այդ վերաբերմունքը անակնկալ է եղել նաև հենց կուսակցության համար ինքնին, քանի որ հակառակ պարագայում ԲՀԿ պատվիրակությունը ներկա չէր լինի ԵԺԿ հավաքին: Փաստորեն, «Բարգավաճ Հայաստանը» չի էլ կասկածել, որ իրեն կարող են մերժել: Եվ հետաքրքրական է նաև, որ ԵԺԿ-ն էլ Բարգավաճին մերժում է ըստ էության առանց բացատրության, ինչը ոչ միայն մերժել է, այլ նաև պարզապես անտեսել, համարել, որ այդպիսի ուժ չկա, և կարիք էլ չկա բացատրելու, թե ինչու չեն վերցնում:
Մի խոսքով, Եվրոպական ժողովրդական կուսակցության այս վերաբերմունքի դրսևորումը իրականում վկայեց, որ Հայաստանում առկա ներիշխանական խմորումներն ամենևին էլ զուտ ներհայկական չեն և ունեն նաև արտաքին լուրջ ճյուղավորումներ և չի բացառվում` նաև արմատներ, ինչի վկայությունն էլ երևի թե այն է, որ արտերկրում տեղի են ունենում ԲՀԿ-ի հետ կապված պրոցեսներ, որոնք զարմանալիորեն ներդաշնակ են ներքին գործընթացներին և համահունչ` դրանց տրամաբանությանը:
