Iran News-ի փոխանցմամբ՝ ԵՄ արտաքին քաղաքականության ծառայության (EEAS) ղեկավար Մայա Կոչիյանչիչը հերքել է այն տեղեկատվությունը, թե ԵՄ-ի երկրները փոխհամաձայնության են եկել՝ իրանական նավթի ներկրման վրա բեռնարգելք սահմանելու հարցում.
«Իրանի միջուկային ծրագրի վերաբերյալ ԱԷՄԳ-ի հրապարակած վերջին զեկույցի ֆոնին ԵՄ-ի անդամ երկրների արտգործնախարարները դիտարկել են Իրանի նկատմամբ պատժամիջոցների կիրառման հարցը։ Մի շարք երկրներ իսկապես առաջարկել են իրանական նավթի ներկրման վրա բեռնարգելք դնել, սակայն այդ կապակցությամբ կոնկրետ որոշում չի կայացվել։
Իրանական նավթի վրա բեռնարգելք դնելու հարցում մենք չկարողացանք փոխհամաձայնության գալ։ Այժմ դիտարկվում է նոր միջոցների հարցը։ ԵՄ-ի անդամ երկրների արտգործնախարարների խորհրդի հաջորդ նիստը տեղի կունենա հաջորդ տարվա հունվարին»։
Հիշեցնենք, որ 2 օր առաջ էներգետիկ գծով եվրակոմիսար Գյունթեր Օթթինգերը հայտարարել էր, որ ԵՄ-ի անդամ երկրները համաձայնության են եկել իրանական նավթի ներկրման վրա բեռնարգելք դնելու շուրջ։