Ռուսաստանում կայացած Պետդումայի ընտրություններում էական խախտումներ չեն գրանցվել: Այսօր կայացած մամուլի ասուլիսում այս մասին հայտարարեց ՌԴ Պետդումայի ընտրությունների դիտորդական խմբի անդամ, ՀՀԿ-ական պատգամավոր Արտակ Դավթյանը:
«Մեր եղած 12 ընտրատեղամասերից յուրաքանչյուրում անցկացնում էինք 30-40 րոպե: Ընտրությունները բավական հանդարտ ու հանգիստ էին ընթանում: Դրանցից մեկում ձայների հաշվարկման ժամանակ առաջին տեղում կոմունիստներն էին, երկրորդում` «Արդար Ռուսաստան»-ը: Իշխող «Եդինայա Ռոսիա»-ն միայն երրորդն էր»,- նկատեց նա:
Արտակ Դավթյանը միաժամանակ չբացառեց, որ Ռուսաստանի ողջ տարածքում տեղակայված 95 հազար տեղամասերում որոշակի խախտումներ կարող են եղած լինել: «Սակայն այս ընտրությունները խոշոր հաշվով արտահայտում են ռուս ժողովրդի կամքը: Այո, դրանք ազատ և արդար ընտրություններ էին»,- նշեց Դավթյանը:
Անդրադառնալով հայաստանյան իրականության վրա ռուսաստանյան վերջին ընտրությունների հնարավոր ազդեցությանը` խորհրդարանականը նկատեց, որ Պետդումայի ընտրությունների արդյունքները պետք է վերլուծության տեղիք տան:
«Իմանալու համար, թե ինչպիսին կլինի ընտրությունների ազդեցությունը Հայաստանի վրա, նախ պետք է սպասենք` տեսնելու, թե ինչ կառավարություն է ձևավորվում Ռուսաստանում: Միաժամանակ «Եդինայա Ռոսիա»-ի` համեմատաբար քիչ ձայներ ստանալու հանգամանքը ճիշտ չի լինի պրոյեկտել Հայաստանում: Պատճառը երկու երկրներում առկա իրավիճակների տարբերությունն է»,- բացատրեց դիտորդական խմբի անդամը:
Ասուլիսի մյուս բանախոս, ԼՂ նախկին արտգործնախարար Արման Մելիքյանն իր հերթին նկատեց, որ տեխնիկական մասով ռուսաստանյան խորհրդարանական ընտրություններն այնքան էլ վատը չեն եղել:
«Անշուշտ, Պետդումայի ընտրություններում վարչական ռեսուրսն օգտագործվել է և օգտագործվել է լայնամասշտաբ կերպով: Այն օգտագործվել է նաև լրատվամիջոցներին բռնաճնշելու համար: Ռուսաստանն, իմ կարծիքով, նոր է ստեղծում իր պետականության իրական հիմունքները և շատ առումներով փոքր-ինչ փոքրացված Խորհրդային Միություն է հիշեցնում:
Չեմ կարծում, թե այս ընտրություններն արտահայտում են ռուսաստանցի ընտրողների կամքը: Մարդիկ հիմնականում կողմնորոշված չեն, Ռուսաստանում չկա կոնսոլիդացված ընդդիմություն, և Պետդումայում, ըստ էության, ընդդիմությունը ներկայացված չէ` չհաշված միջին տարիքից անց, երազանքներով ապրող կոմունիստներին»,- ասաց նախկին պաշտոնյան:
Հիշեցնենք, որ Պետդումայի ընտրությունները Ռուսաստանում տեղի էին ունեցել դեկտեմբերի 4-ին: Իշխող «Եդինայա Ռոսիա» կուսակցությունը գրեթե 15 տոկոսով պակաս ձայներ էր ստացել, քան նախորդ ընտրությունների ժամանակ: