Moody’s միջազգային վարկանիշային գործակալությունը Հայաստանի կանխատեսումը «կայունից» իջեցրել է «բացասական»` պայմանավորված Եվրոպայում և Ռուսաստանում տնտեսական աճի տեմպերի դանդաղեցմամբ:
Moody’s նշել է, որ Եվրոպային և Ռուսաստանին բաժին է ընկնում հայկական արտահանման 58 %-ը, և Հայաստանի կախվածությունը ռուսաստանյան շուկայից իր մեջ ռիսկեր է պարունակում:
Moody’s-ը նաև կարծում է, որ մետաղների գների հնարավոր նվազումը ևս կարող է ազդել Հայաստանի տնտեսության վրա: Գործակալությունը նաև ուշադրություն է դարձնում այն փաստին, որ Հայաստանի արտաքին պարտքը կրկնապատկվել է վերջին 3 տարիների ընթացքում:
Միաժամանակ, Moody’s-ը տեղեկացրել է, որ Հայաստանի կառավարությունը հավատարիմ է ֆիսկալ կարգապահության ամրապնդմանը և 2012թ. պետբյուջեի նախագծի համաձայն ծրագրում է կրճատել դեֆիցիտը մինչև ՀՆԱ-ի 3.1 %-ը: Այդուհանդերձ,
Moody’s-ը նշում է, որ այդ ծրագրերի իրագործման համար առկա են «նշանակալի» ռիսկեր:
Ինչպես նկատում է «Մեդիամաքս» գործակալությունը, 2010թ. մայիսին Moody’s-ը հրապարակել է իր ամենամյա հաշվետվությունը, որում ասվում է, որ Հայաստանի B2 վարկանիշը (կայուն կանխատեսմամբ) հավասարակշռում է ցածր տնտեսական կայունությունը և կառավարության բարձր ֆինանսական ներուժը:
«2009թ. Հայաստանը բախվեց լուրջ մարտահրավերների: Չնայած Հայաստանը չկրեց համաշխարհային ֆինանսական ճգնաժամի ուղղակի ազդեցությունը փոքր բանկային հատվածի պատճառով, դրամական փոխանցումների կտրուկ կրճատումը հանգեցրեց ՀՆԱ 15% կրճատմանը»,- նշում էր Moody’s-ի փոխնախագահ, սուվերեն վարկանիշերի խմբի ավագ վերլուծաբան Էնթոնի Թոմասը:
Հաշվետվությունում ասվում էր, որ Հայաստանի իշխանությունները պատասխանել են միջոցառումների համապարփակ և հավակնոտ փաթեթով, ներառյալ պարզեցված հարկային և դրամային քաղաքականությունը:
Moody’s-ի վերլուծաբանները նշում էին, որ չնայած այդ միջոցառումները մի փոքր սահմանափակել են ՀՆԱ նվազման միտումը, դրանք լրջորեն վատթարացրել են կառավարության պարտքի պարամետրերը:
Միաժամանակ, Moody’s-ը նկատում էր, որ Հայաստանն իր քաղաքականությունն իրականացրել է ԱՄՀ-ի հետ համաձայնեցված, և դրա շարունակումը կառավարությանը թույլ կտա դադարեցնել պարտքի պարամետրերի վատթարացումը:
«Սակայն եթե Հայաստանը չկարողանա լիովին կատարել ԱՄՀ-ի հետ ձեռքբերված համաձայնագիրը, երկրի վարկանիշը կարող է հայտնվել ճնշման տակ»,- նշել էր Էնթոնի Թոմասը:
