Google ընկերությունը բացել է Android օպերացիոն համակարգի տարբերակի ելքային ծածկագիրը, որը հայտնի է Ice Cream Sandwich ծածկագրային անվան տակ: Այս մասին հայտնվում է Google+ սոցիալական ցանցում՝ մշակողների համար խմբում:
Հրապարակված ծածկագիրը պատկանում է Android 4.0.1-ին: Օպերացիոն համակարգի այս նոր տարբերակը կիրառվելու է Galaxy Nexus սմարթֆոնների վրա, որոնք Google ցուցադրել էր հոկտեմբերին: Անհրաժեշտ ուղղորդումները տեղադրված են Android-ի կայքում:
Նշվում է, որ, Ice Cream Sandwich ծածկագրից բացի, առկա է նաև Honeycomb ծածկագիրը, որը նախկինում չի հրապարակվել: Սակայն Google-ում նշում են, որ Honeycomb-ը դեռ անմշակ համակարգ է, և կոչ են անում մշակողներին կենտրոնանալ ՕՀ նոր տարբերակի վրա:
Ելքային ծածկագրի հրապարակումը մշակողներին թույլ կտա Android 4.0 միջավայրի համար նոր հավելվածներ գրել: Բացի այդ, ծածկագրի հրապարակումից հետո էնտուզիաստները սովորաբար «ոչ պաշտոնապես» հավաքում են ՕՀ իրենց տարբերակները, որոնք նախատեսված են տարբեր սարքավորումների վրա տեղադրելու համար:
Սպասվում է, որ Android 4.0 համակարգով աշխատող առաջին սարքավորումը կլինի Galaxy Nexus սմարթֆոնը, որը Google և Samsung ընկերությունների համագործակցության արդյունքն է: Նրա վաճառքի ճշգրիտ ժամկետը չի նշվում: 2012 թվականին կներկայացնվեն նաև Ice Cream Sandwich-ի հիման վրա մի քանի սարքավորումներ:
