Իջևանի քաղաքապետի պաշտոնում ԲՀԿ-ական թեկնածուի հաղթանակից հետո ՀՀԿ-ն պետք է անհրաժեշտ հետևություններ անի. դա, փաստորեն, ՀՀԿ մարզային կառույցի մեծ վրիպումն է, պարտությունը: «Առաջին լրատվական»-ի հետ զրույցում նման տեսակետ հայտնեց սոցիոլոգ Ահարոն Ադիբեկյանը` մեկնաբանելով Իջևանում նախօրեին տեղի ունեցած ընտրություններում ԲՀԿ-ական Վարդան Ղալումյանի հաղթանակի փաստը:
«Տրամաբանական սխալ կլինի միանշանակորեն պնդել, որ «Հանրապետական» կուսակցությունը, թույլ տալով ընտրություններում հաղթել ԲՀԿ-ական թեկնածուին, այսկերպ զիջումների է գնում: Նմանօրինակ դեպքերը պետք է շատ լինեն, որ կարողանանք համապատասխան եզրակացություն անել: Սա կարող է ընդամենը ախտանշան լինել, որ գոյություն ունեն խնդիրներ, որոնք ՀՀԿ-ն այսօր չի կարողանում լուծել: Նման մակարդակի ընտրություններում գաղափարական, կուսակցական պատկանելությունը երրորդ պլանի խնդիր է: Առաջին պլանում այլ հատկանիշներ են կարևոր` ո՞վ է ընտրվածի շրջապատը, կաշառակե՞ր է նա, թե ոչ և այլն:
Այլ խնդիր է, որ ԲՀԿ-ական թեկնածուի` Իջևանի քաղաքապետ ընտրվելը կազմակերպչական առումով ՀՀԿ մարզային կառույցի մեծ վրիպումն է, պարտությունը: Երևի կուսակցական կառույցները հետևություններ կանեն, թե ինչպես է լինում, որ իրենք զիջում են իրենց պատկանող դիրքը: Նրանք պետք է հետևություններ անեն, որ հետագա ընտրություններում կարող է հաղթել նա, ով արժանի է, այլ՝ ոչ նա, ում գրպանում այս կամ այն կուսակցության տոմսն է»,- նշեց սոցիոլոգը:
Նրա խոսքով, կարևոր է, որ ընտրությունները եղել են արդար, խաբեություններ, մեքենայություններ չեն եղել: «Սա օրինակ է, որ ապագա ընտրություններում ևս կարելի է ընտրել այն մարդուն, ում ցանկանում ես: Սա դրական է բոլորիս համար: Մարդիկ ընտրել են այն թեկնածուին, որը, գտնում են, ավելի լավ քաղաքապետ կլինի»,- ամփոփեց Ահարոն Ադիբեկյանը:
