Երեկ կայացած հերթական աշխատանքային խորհրդակցության ժամանակ Տարոն Մարգարյանն ասել է, որ մայրաքաղաքի կենտրոնական փողոցներում ապօրինի և ինքնակամ կրպակների ապամոնտաժման գործընթացը շարունակական է լինելու: Սակայն քաղաքապետի ժամանակավոր պաշտոնակատարը նաև նշել է, որ բանակցություններ են տարվելու սեփականատերերի հետ և առաջարկվելու են հարցի լուծման ընդունելի տարբերակներ:
Տարոն Մարգարյանի այս հայտարարությունը հույս է ներշնչում կրպակատերերին, և նրանք հույս ունեն, որ ապամոնտաժման գործընթացը շարունակվելու է միայն Աբովյան փողոցում: Կրպակատերերը որոշել են նամակով հանդիպում և քննարկում խնդրել քաղաքապետի ժամանակավոր պաշտոնակատար Տարոն Մարգարյանից:
«Մենք որոշել ենք նորից նամակ գրել քաղաքապետարան և ընդունելություն խնդրել քննարկումներ կազմակերպելու ակնկալիքով: Հույս ունենք, որ Տարոն Մարգարյանը ոչ թե մասայական ապամոնտաժում է անցկացնելու, այլ միայն Աբովյան փողոցի կրպակներն են ապամոնտաժվելու, որովհետև նա ի սկզբանե դեմ է եղել այդ կրպակներին»,- «Առաջին լրատվական»-ի հետ զրույցում տեղեկացրեց Կրպակատերերի պաշտպանության կազմկոմիտեի նախագահ Արևիկ Ղազարյանը:
Գրությունն արդեն պատրաստ է, որով կրպակատերերը կդիմեն Տարոն Մարգարյանին` խնդրելով ընդունելություն կազմակերպել կրպակատերերից մի քանիսի հետ՝ հետագա գործողությունների վերաբերյալ քննարկումներ ծավալելու նպատակով: Այն հարցին, թե կրպակատերերն ի՞նչ են անելու այն դեպքում, եթե նույնիսկ քաղաքապետի ժամանակավոր պաշտոնակատար Տարոն Մարգարյանը չընդունի իրենց՝ Ա. Ղազարյանը պատասխանեց, որ կշարունակեն բողոքի ակցիաները ոչ միայն կառավարության, այլև քաղաքապետարանի շենքի առջև՝ այնքան ժամանակ, մինչև կընդունեն, կլսեն կրպակատերերի խնդրանքը:
Նշենք նաև, որ Արշակ Սադոյանը խոստացել էր միջնորդել քաղաքապետարանին քննարկումներ կազմակերպելու համար, բայց կրպակատերերը լիահույս չեն, որ Հանրային խորհրդի միջնորդությունը ավելի շուտ արձագանք կգտնի, քան իրենց դիմում-խնդրանքը:
