«Բանակում տեղի ունեցող դեպքերի մասին բարձրաձայնելը շահարկում անվանել չի կարելի, ի՞նչ է նշանակում անտեղի կամ չափից դուրս շահարկել»,- «Առաջին լրատվական»-ի հետ զրույցում հարց հնչեցրեց «Բանակն իրականում» նախաձեռնության խմբի անդամ Լալա Ասլիկյանը` անդրադառնալով ՀՀ պաշտպանության նախարար Սեյրան Օհանյանի այն հայտարարությանը, թե իրենք անընդունելի են համարում որոշ խմբերի կողմից բանակի խնդիրների միտումնավոր և ամենօրյա շահարկումը:
Նրա խոսքով՝ բանակում տեղի ունեցող իրադարձությունների մասին բարձրաձայնողները հենց այնպես չեն բողոքում, այլ հենվում են կոնկրետ փաստերի վրա: «Ամեն ինչ այնքան վատ է, որ փաստերն ինքնին խոսում են իրենց մասին: Ոչ ոք բանակում տեղի ունեցող դեպքերը չի ուռճացնում, մենք ընդամենը փաստերն ենք արձանագրում, որպես հասարակության ներկայացուցիչներ` ձայն ենք բարձրացնում: Ի՞նչ է նշանակում, ասենք, չափից դուրս խոսել բանակում կատարվող դեպքերի մասին: Օրինակ՝ զոհված զինվորի մորը կարո՞ղ եք ասել` չափից դուրս ես լացում: Պնախարարն իր այս հայտարարությամբ, կոպիտ ասած, ոնց որ ասի`խելոք մնացեք, թե չէ մի բան կանենք»,- նկատեց Լալա Ասլիկյանը:
Նրա խոսքով, եթե որևէ մեկը խախտում է օրենքը, օրենքի ուժով էլ պետք է պատժվի: «Բայց մենք միայն փաստերն ենք ներկայացնում: Ինչի՞ համար շահարկել: Ինչի մասին մենք ենք ասում, նույնի մասին ասում է նաև հասարակությունը: Իսկ հասարակությունն ասում է`վերջ տվեք սպանություններին և բռնություններին: Կարծես հասարակությանն ասես` մի շահարկիր դա: Բայց շահարկես, չշահարկես` բռնությունները բանակում շարունակվում են: Պետք է վերջ տալ այս ամենին, հասարակությունն էլ կլռի: Եթե հասարակությունը տեսնի, որ բանակում առկա իրավիճակը շտկելուն ուղղված միջոցառումներ են ձեռնարկվում, ինքնըստինքյան կլռի»,- նկատեց «Բանակն իրականում» նախաձեռնության խմբի անդամը:
Նշենք, որ երեկ` հոկտեմբերի 28-ին, ՀՀ պաշտպանության նախարարությունում տեղի ունեցած կոլեգիայի նիստում Պնախարար Սեյրան Օհանյանն անդրադարձել էր նաև բանակի խնդիրների շուրջ հասարակական քննարկումներին: Պաշտպանության նախարարը մասնավորապես ասել էր. «Մենք հասկանում և ընդունում ենք արտակարգ պատահարներից հետո հասարակության կողմից բանակին ուղղված կառուցողական քննադատությունը, ավելին` այդ քննադատությունը օգտակար է և պետք է դասեր քաղել դրանից, սակայն անընդունելի ենք համարում որոշ խմբերի կողմից բանակի խնդիրների միտումնավոր և ամենօրյա շահարկումը: Այսուհետև պաշտպանական գերատեսչությունը առավել խիստ մոտեցում է ցուցաբերելու բոլոր նրանց նկատմամբ, ովքեր բանակը վարկաբեկում են ամեն գնով, ու եթե այդ մարդիկ կեղծ տեղեկություններ և հերյուրանքներ տարածելով փորձեն վնաս հասցնել բանակին, իրավական դաշտում նրանց պատասխանատվությունը լինելու է անխուսափելի»: