Ոստիկանապետն իրավունք չունի խախտելու մարդկանց ազատ տեղաշարժման սահմանադրական իրավունքը: «Առաջին լրատվական»-ի հետ զրույցում նման տեսակետ հայտնեց «Բանակն իրականում» քաղաքացիական նախաձեռնության ակտիվիստ, «Բանակն առանց մարդասպանների» նախաձեռնության ղեկավար Արսեն Խառատյանը`անդրադառնալով ՀՀ ոստիկանապետի այն հայտարարությանը, թե ոստիկանությունը միջոցներ ձեռք կառնի, ընդհուպ ուժի կիրառում, եթե ակցիաներն ուղեկցվեն վիրավորական վանկարկումներով:
«Մարդիկ համարում են, որ Ալիկ Սարգսյանը հանցագործ է և անվանում են, եթե նա դա որպես վիրավորանք է ընդունում՝ իր խնդիրն է: Իսկ վանկարկողները կամ տարբեր ակցիաներ անցկացնողներն ակցիաներով իրենց պահանջներն են ձևակերպում կառավարության շենքի առջև»,- մեկնաբանեց Ա. Խառատյանը` բողոքի ակցիաները խոչընդոտելը աբսուրդ համարելով:
Նա այն կարծիքին է, որ բողոքի ակցիաներ խոչընդոտելը կառավարության ղեկավարի խնդիրն է, ոչ թե ոստիկանապետի: Այն հարցին, թե ոստիկանապետի հայտարարությունը կընկճի՞ ակցիաները, թե՞ ոչ՝ Ա. Խառատյանը պատասխանեց, որ ակցիաները կշարունակվեն: «Եթե մարդիկ ունեն բողոք հայտնելու, նրանց այդ հնարավորությունը պետք է տրվի: Ի՞նչ են արել բողոքի ակցիաներ անցկացնող մարդիկ, օրենքի ո՞ր կետն են խախտել և ի՞նչ հիմքով են խախտում մարդկանց ազատ տեղաշարժվելու սահմանադրական իրավունքը»,- մտահոգություն հայտնեց Ա. Խառատյանը` ընդգծելով, որ ակցիաներ արգելելը մարդու սահմանադրական իրավունքի խախտում է:
