Ինչպես տեղեկացնում է «Առաջին լրատվական»-ը, դեռվ շարունակվում է ՀՀ նախագահ Սերժ Սարգսյանի պետական այցը Ռուսաստանի Դաշնությունում:
Հանրապետության ղեկավարն այսօր ՌԴ Դաշնային խորհրդի և Պետդումայի նախագահների հետ հանդիպումներից հետո այցելել է Մոսկվայի քաղաքապետարան:
Քաղաքապետ Սերգեյ Սոբյանինի հետ հանդիպմանը Ս.Սարգսյանը նշել է, թե շատ ուրախ է Երևանի և Մոսկվայի միջև տարեցտարի ամրապնդվող հարաբերությունների և տարբեր ոլորտներում համագործակցության խորացման համար:
Սերգեյ Սոբյանինը տեղեկացրել է, որ քաղաքապետարանում մշակվում է առաջիկա տարիների համար Երևանի հետ համագործակցության նոր ծրագիր և հույս է հայտնել, որ այն կներառի փոխադարձ հետաքրքրություն ներկայացնող բոլոր ոլորտները:
Ս.Սարգսյանը և Մոսկվայի քաղաքապետը կարևորել են Մոսկվայի հայ համայնքի դերն ինչպես երկու մայրաքաղաքների, այնպես էլ հայ-ռուսական հարաբերությունների առավել ամրապնդման գործում:
Քաղաքապետ Սոբյանինը նշել է, որ Մոսկվայում մեծ թվով հայեր են ապրում և նրանց մեջ կան գործարարության ու այլ բնագավառներում զգալի հաջողությունների հասած անձինք:
Հանդիպմանը քննարկվել են կրթության, մշակույթի, զբոսաշրջության, առևտրատնտեսական և մի շարք այլ ոլորտներում համագործակցությանն առնչվող հարցեր:
Ս. Սարգսյանն այսօր հանդիպելու է նաև ՌԴ կառավարության նախագահ Վլադիմիր Պուտինի հետ: Երեկոյան Ս. Սարգսյանի գլխավորած պատվիրակությունը կվերադառնա Երևան:
