Լիբիայի նախկին առաջնորդ Մուամար Քադաֆիի որդին` Սեյֆ Ալ-Իսլամը, պատրաստվում է փախչել արտասահման: Ինչպես հայտնում է Reuters գործակալությունը՝ վկայակոչելով Լիբիայի Ազգային անցումային խորհրդի հայտարարությունը, նա այժմ գտնվում է Լիբիայի հարավում և կարող է անցնել Ալժիրի կամ Նիգերի սահմանը:
«Նա մոտ է Նիգերի և Ալժիրի սահմանին, Գաթ քաղաքից հարավ: Ընդ որում, Մարզուկում նա կեղծ անձնագիր է ձեռք բերել»- հայտարարել է ԱԱԽ ներկայացուցիչը և ավելացրել, որ իրենք կարողացել են գաղտնալսել Սեյֆ Ալ-Իսլամի և Լիբիայի հետախուզության նախկին ղեկավար Աբդուլալհ Սանուսիի հեռախոսային խոսակցությունը, որում Սանուսին խորհուրդ էր տալիս, թե ինչպես անցնել սահմանը:
Չճշտված տեղեկությունների համաձայն` Սեյֆ Ալ-Իսլամ Քադաֆին հոր հետ մասնակցել է Սիրթի պաշտպանությանը: Սակայն, ի տարբերություն հոր, նրան հաջողվել է դուրս գալ շրջափակումից: Հոր մահվան մասին լուրը լսելուց հետո նա ելույթ է ունեցել մերձավորարևելյան հեռուստաալիքներից մեկի եթերում և խոստացել շարունակել պայքարը իշխանությունը վերադարձնելու համար: