Թուրքական Zaman թերթի փոխանցմամբ՝ երկրի հարավարևելյան հատվածում ընկած Բիթլիսի նահանգի Գյուրոյմաք շրջանում ահաբեկիչների ականապատած ճանապարհին պայթել է ոստիկանների փոխադրամիջոցը։
Պայթյունի արդյունքում զոհվել է 4 ոստիկան, ծանր վիրավորվել են 2-ը, որոնցից մեկը կին է։ Վիրավորները տեղափոխվել են Բիթլիսի պետական հիվանդանոց։
Նշվում է, որ թուրք ոստիկանները վերադառնում էին հրաձգարանից։ Տարվում է հետաքննություն։
Թեև թուրքական լրատվամիջոցները տեղի ունեցածում դեռևս չեն շոշափում Թուրքիայում ահաբեկչական հռչակված ու արգելված «Քրդստանի աշխատավորական» կուսակցության (PKK) անունը, սակայն կարելի է կարծել, որ սա հենց նրա ձեռքի գործն է, քանի որ PKK-ն վերջին շրջանում բազմիցս աչքի է ընկել ճանապարհների ականապատումներով, որոնց վրա պայթել են թուրք զինծառայողների, ոստիկանների փոխադրամիջոցները և անգամ բեռնատար գնացքները։
