Ռուսական Regnum լրատվական գործակալության փոխանցմամբ՝ իրանական Parsine.com իշխանամետ կայքում հրապարակվել է «Գոյություն ունեն 10 երկիր, որոնց գոյության մասին դուք չգիտեք» խորագրով հոդվածը։ Իրանական կայքն այդ երկրների թվում ընդգրկել է նաև Լեռնային Ղարաբաղի Հանրապետությունը (ԼՂՀ)։
Հոդվածում նշված է. «Աշխարհի մի շարք երկրներ այնքան փոքր են, որ նրանց գոյության մասին դուք, ամենայն հավանականությամբ, չեք էլ լսել։ Այդ երկրների բնակչությունը նույնպես մեծ չէ։ Հենց այդ պատճառով էլ դուք տեղյակ չեք նրանց գոյության մասին, մինչդեռ նրանք գոյություն ունեն։
Այստեղ մենք ձեզ կներկայացնենք 10 այդպիսի ոչ մեծ երկրներ»։
Իրանական կայքն այդ երկրների թվարկումը սկսում է հենց ԼՂՀ-ից՝ ներկայացնելով նրա դրոշն ու գերբը, տվյալներ նրա տարածքի, բնակչության ու մայրաքաղաք Ստեփանակերտի մասին։ Հոդվածի ղարաբաղյան մասում նաև նշված է հետևյալը. «Լեռնային Ղարաբաղը հանրապետություն է, որն ընկած է Հայաստանի և Ադրբեջանի միջև ու չի պատկանում այս երկրներից և ոչ մեկին։ Բնակչության 95 տոկոսը կազմում են հայերը, իսկ մնացած մասը՝ հույներն ու քրդերը»։
Իրանական իշխանամետ կայքի այս հրապարակումն արդեն իսկ բացասական արձագանքի է արժանացել Ադրբեջանում։ Բաքվեցի հայտնի փորձագետ Մուբարիզ Ահմեդօղլուն հայտարարել է, որ դրանով պաշտոնական Թեհրանը փորձում է հայերին համոզել ԵԱՀԿ Մինսկի խմբի գործունեության անարդյունավետության հարցում, ինչպես նաև նրանում, որ Իրանը կարող է Ղարաբաղյան հակամարտության կարգավորման գործընթացում դառնալ ավելի արդյունավետ միջնորդ։
Հիշեցնենք, որ վերջին շրջանում իրանական կողմը բազմիցս հայտարարել է, որ տարածաշրջանային հակամարտությունների կարգավորմամբ պետք է զբաղվեն հենց տարածաշրջանային, ոչ թե այլ երկրները, քանի որ տարածաշրջանային երկրներն առավել ծանոթ են տարածաշրջանի իրողություններին։
