Amnesty International միջազգային կազմակերպության իրավապաշտպանները կոչ են արել Կանադայի իշխանություններին ձերբակալել ԱՄՆ նախկին նախագահ Ջորջ Բուշ կրտսերին: Այսպիսի կոչով կազմակերպությունը հանդես է եկել՝ կապված Ջորջ Բուշի` հոկտեմբերի 20-ին Կանադա նախատեսվող այցի հետ:
Իրավապաշտպանները նշում են, որ իր նախագահության տարիներին Բուշը կարգադրել է կտտանքներ կիրառել ահաբեկչական գործողությունների մեջ կասկածվողների դեմ: Կազմակերպության ներկայացուցիչների խոսքերով` Բուշին ձերբակալելու պահանջով փաստաթղթերը իրենք հանձնել են Կանադայի իշխանություններին դեռ սեպտեմբերի 21-ին:
Իրավապաշտպանները կարծում են, որ Ջորջ Բուշին պետք է պատասխանատվության ենթարկի միջազգային հանրությունը, քանի որ ԱՄՆ իշխանությունները հրաժարվում են դա անել: «Եթե Կանադան միջոցներ չձեռնարկի նրա այցի ժամանակ, նա կխախտի Կտտանքների դեմ ՄԱԿ-ի կոնվենցիան և արհամարհանք կցուցաբերի մարդու հիմնական իրավունքների նկատմամբ»,- ասվում է կազմակերպության հայտարարության մեջ:
Նշենք, որ 2011 թ. փետրվարին իրավապաշտպանների նմանատիպ պահանջների հետևանքով Բուշը հետաձգեց այցը Շվեյցարիա: