Հունիսի 7-ին կայանալիք խորհրդարանական ընտրություններից առաջ Հայաստանը հայտնվել է ռուսական ծավալուն ապատեղեկատվական արշավի թիրախում, ինչը հետազոտողները որակում են որպես վերջին տարիների ամենաընդգրկուն գործողություններից մեկը:
Ըստ Euronews-ի փոխանցման՝ մինչև մայիսի սկիզբը հրապարակվել է 343 կեղծ տեսանյութ, որոնց ծավալը զիջում է միայն 2025 թվականի Մոլդովայի ընտրությունների ժամանակ նկատված արշավին։ Մարտի սկզբին մեկնարկած այս արշավը հանդիսանում է պրոկրեմլյան «Մատրյոշկա» գործողության մի մասը, որտեղ ակտիվորեն կիրառվում է արհեստական բանականությունը և սոցիալական մեդիայի բոտերի ցանցը՝ կեղծ պնդումների տարածումն ու դիտումների քանակն արհեստականորեն ուռճացնելու համար։
Կեղծված նյութերի կենտրոնական թեզն այն է, թե եվրոպամետ կուրս որդեգրած վարչապետ Նիկոլ Փաշինյանի հաղթանակը կարող է պատերազմ հրահրել Հայաստանի և Ռուսաստանի միջև։ Բոտերի ցանցերն ուսումնասիրող Antibot4Navalny համայնքը հայտնաբերել է Փաշինյանի և Ֆրանսիայի նախագահ Էմանուել Մակրոնի մասնակցությամբ ավելի քան մեկ տասնյակ կեղծ տեսանյութեր, որոնք տարածում են «գաղտնի գործարքի» մասին լուրեր, թե իբր Ֆրանսիան ընտրություններում աջակցության դիմաց պահանջում է, որ Հայաստանը հաղթանակից հետո պատերազմ սկսի Ռուսաստանի դեմ:
Բացի այդ, կեղծվել են լրատվական հաղորդումներ, որոնցում, օրինակ, հայտարարվում է Հայաստանում ՆԱՏՕ-ի հրահանգիչների ներկայության կամ ընտրություններից հետո Ռուսաստանի հետ ռազմական բախում հրահրելու ծրագրերի մասին, ինչը, սակայն, որևէ փաստացի հիմք չունի:
Այս տեղեկատվական գրոհը տեղի է ունենում Եվրամիության և Հայաստանի միջև հարաբերությունների աննախադեպ սերտացման ֆոնին, ինչի վառ ապացույցն էր մայիսի սկզբին Երևանում կայացած ԵՄ-Հայաստան առաջին գագաթնաժողովը:
