Նիդերլանդական Oceanwide Expeditions ընկերությանը պատկանող MV Hondius զբոսաշրջային նավում արձանագրված հանտավիրուսի բռնկումը միջազգային անհանգստության պատճառ է դարձել։ Արտասահմանյան լրատվամիջոցների փոխանցմամբ՝ վարակից արդեն մահվան դեպքեր կան, իսկ այժմ աշխարհի տարբեր երկրներում փորձում են գտնել նավի ուղևորներին, որոնք կարող էին վարակվել։
Տեղեկությունների համաձայն՝ ապրիլին, նավում առաջին մահվան դեպքից հետո, առնվազն 29 ուղևոր իջել է բրիտանական Սուրբ Հեղինե կղզում։ Նրանք եղել են 12 տարբեր երկրների քաղաքացիներ և հետագայում մեկնել տարբեր պետություններ։ Առողջապահության համաշխարհային կազմակերպությունը հաստատել է նավի հետ կապված հինգ վարակման դեպք՝ ութ կասկածելի դեպքերից։ Սակայն մասնագետները չեն բացառում, որ վարակվածների թիվը կարող է ավելանալ։
Հանտավիրուսը վտանգավոր վարակ է, որը կարող է ծանր վնաս հասցնել ներքին օրգաններին։ Վիրուսի հիմնական տարածողները կրծողներն են, իսկ մարդը հիմնականում վարակվում է դրանց արտաթորանքների կամ վիրուս պարունակող փոշու մասնիկների հետ շփման արդյունքում։
Հիվանդության հիմնական ախտանշաններն են՝ բարձր ջերմություն, ուժեղ գլխացավ, մկանային ցավեր, թուլություն, սրտխառնոց և փսխում։ Որոշ դեպքերում հիվանդությունը կարող է հանգեցնել ծանր բարդությունների և մահվան։
