ԱՄՆ զինված ուժերը հայտնել են, որ ամերիկյան KC-135 օդանավը վթարի է ենթարկվել Իրաքի արևմտյան շրջանում՝ մեկ այլ օդանավի հետ տեղի ունեցած միջադեպի հետևանքով։
Կենտրոնական հրամանատարությունը հաղորդել է, որ օդանավերից մեկը կործանվել է Իրաքի արևմուտքում, իսկ երկրորդը անվտանգ վայրէջք է կատարել։ «Դա կապված չի եղել թշնամական կամ դաշնակիցների կրակի հետ»,- ասված է հաղորդագրության մեջ։
Սակայն ավելի ուշ, «Իրաքի իսլամական դիմադրությունը»՝ Իրանին աջակցող զինված խմբավորումների միավորումը, պատասխանատվություն է ստանձնել Իրաքի արևմուտքում կործանված KC-135 օդանավի համար՝ պնդելով, որ այն խոցվել է «մեր երկրի ինքնիշխանության և օդային տարածքի պաշտպանության» նպատակով, հաղորդում է Reuters-ը։
KC-135-ը դարձել է Մերձավոր Արևելքում պատերազմի ընթացքում կորցրած ԱՄՆ չորրորդ ռազմական օդանավը։ Գործողության սկզբում Իրանի դեմ ԱՄՆ-Իսրայել համատեղ գործողության ժամանակ երեք F-15 կործանիչներ սխալմամբ խոցվել են Քուվեյթի կողմից։
