Հոնդուրասի Ազգային ընտրական խորհուրդը (ԱԸԽ) նախագահական ընտրություններում հաղթող է հայտարարել Ազգային կուսակցության ներկայացուցիչ Նասրի Ասֆուրային, որին աջակցում է ԱՄՆ նախագահ Դոնալդ Թրամփը: Այս մասին հաղորդում է BBC-ն։
Ասֆուրան ստացել է ձայների 40,3%-ը՝ չնչին տարբերությամբ առաջ անցնելով աջ կենտրոնամետ Լիբերալ կուսակցությունից իր մրցակից Սալվադոր Նասրալլայից, որը ստացել է ձայների 39,5%-ը։
«Հոնդուրաս, ես պատրաստ եմ կառավարելու։ Ես ձեզ չեմ հիասթափեցնի», – X-ում գրել է Ասֆուրան։
Նասրալլան իր հերթին մամուլի ասուլիսում հայտարարել է, որ չի ընդունում ընտրությունների արդյունքները, սակայն միևնույն ժամանակ իր աջակիցներին կոչ է արել հանդարտություն պահպանել։
Քվեարկությունը տեղի է ունեցել նոյեմբերի 30-ին, սակայն քվեաթերթիկների հաշվարկը երկու անգամ հետաձգվել էր տեխնիկական խնդիրների պատճառով։
Հոնդուրասի Կոնգրեսի նախագահ Լուիս Ռեդոնդոն նույնպես ընտրությունների արդյունքները «լիովին անօրինական» է անվանել։
Հեռացող նախագահ Սիոմարա Կաստրոն դեկտեմբերին ավելի վաղ նշել էր, որ ընտրությունները խաթարվում են Թրամփի «միջամտության» պատճառով։
