Հայաստանում Գերմանիայի դեսպանի` ՀԱԿ-ի առաջնորդ Լևոն Տեր-Պետրոսյանի մասին հայտարարությունը թելադրված է մի շարք դրդապատճառներով և չի արտահայտում Գերմանիայի դիրքորոշումը. բացի այդ, նման հայտարարությունը միջամտություն է Հայաստանի ներքաղաքական դաշտի իրադարձություններին: Այս մասին Հայ ազգային կոնգրեսի հանրահավաքում այսօր հայտարարել է ՀԱԿ ներկայացուցիչ Դավիթ Շահնազարյանը:
Նա անդրադարձել է նաև տնտեսական բնույթի խնդիրներին` նկատելով, որ Հայաստանում ազատ տնտեսություն առհասարակ գոյություն չունի:
Շահնազարյանը, դիմելով հանրահավաքի մասնակիցներին, ասել է. «Այսօր դուք` Ազատության հրապարակում կանգնածներդ, դարձել եք Հայաստանի ազատության և ժողովրդավարության փարոսը: ՀԱԿ-ը ևս փարոս է, որ ճանապարհ է ցույց տալիս բոլորին, այդ թվում՝ այս ապաշնորհ իշխանություններին»:
ՀԱԿ ներկայացուցիչն իր ելույթն ավարտել է՝ «Մեր պայքարն անկասելի է, մեր հաղթանակն անխուսափելի է» խոսքերով:
