Կենցաղային ապրանքներ և փաթեթավորված սննդամթերք արտադրող մի շարք ընկերություններ ԱՄՆ-ում սկսում են զսպել գների աճը։
Վերջին ամիսներին ԱՄՆ նախագահ Դոնալդ Թրամփը մի շարք երկրների նկատմամբ սահմանել է լայնածավալ մաքսատուրքեր, ինչը տնտեսագետների շրջանում մտահոգություն է առաջացրել՝ հնարավոր ռեցեսիայի և հումքի ու կոմունալ ծառայությունների գների բարձրացման կապակցությամբ։
Երկուշաբթի օրը նախագահ Թրամփը հանդիպել է խոշոր մանրածախ առևտրային ցանցերի ներկայացուցիչների՝ այդ թվում՝ Walmart-ի և Target-ի ղեկավարների հետ՝ քննարկելու մաքսատուրքերի ազդեցությունը ներմուծվող ապրանքների գների վրա։
«Վերջին քաղաքական և տնտեսական որոշումները թուլացրել են արդեն իսկ անկայուն սպառողական վստահությունը»,– այսօր լրագրողներին հայտնել է Nestlé-ի գործադիր տնօրեն Լորան Ֆրեյշը։
Նրա խոսքով՝ ընկերությունն ԱՄՆ-ում՝ իր ամենամեծ շուկայում, գները նվազեցրել է մեկ տոկոսով։
«Գնագոյացման հարցում մենք պետք է հաշվի առնենք ոչ միայն ծախսերը, այլ նաև հաճախորդների, սպառողների ու մրցակիցների արձագանքը։ Մենք փորձում ենք սահմանել այնպիսի գներ, որոնք թույլ կտան պահպանել ֆինանսական կայունությունը՝ միաժամանակ չկորցնելով սպառողների վստահությունը»,– հավելել է նա։
Dove ապրանքանիշով օճառ արտադրող Unilever-ը, որն էլ իր հերթին հրապարակել է վերջին եկամուտները, նշել է, որ Հյուսիսային Ամերիկայում նկատվում է «սպառողական տրամադրությունների անկում»։ Ընկերությունն այդ տարածաշրջանում գները բարձրացրել է ընդամենը 2.1 տոկոսով։
