Ապրիլի 3-ին Բրյուսելում մեկնարկում է ՆԱՏՕ-ի անդամ երկրների արտաքին գործերի նախարարների հանդիպումը: Ըստ մամուլի՝ օրակարգում մի քանի հարց է՝ եվրոպական անվտանգություն, ՆԱՏՕ-ի և Ասիա-խաղաղօվկիանոսյան տարածաշրջանի երկրների համագործակցություն, ինչպես նաև ՆԱՏՕ-Ուկրաինա խորհրդի նիստ, որին կմասնակցի ինչպես Ուկրաինայի արտգործնախարար Անդրեյ Սիգիբան, այնպես էլ Եվրամիության արտաքին գործերի և անվտանգության քաղաքականության հանձնակատար, Եվրահանձնաժողովի փոխնախագահ Կայա Կալասը:
Անդրադառնալով ՆԱՏՕ-ի երկօրյա նախախարարական «գագաթաժողովին»՝ Թուրքիայի «Անադոլու» պետական գործակալությունը, հղում անել դիվանագիտական աղբյուրներին, հայտնում է, որ արտաքին գործերի նախարար Հաքան Ֆիդանը ոչ միայն կմասնակցի Հյուսիս-ատլանտյան դաշինք-Ուկրաինա խորհրդի նիստին, այլև հանդես կգա կարևոր հայտարարությամբ:
«Սպասվում է, որ նիստի ընթացքում նախարար Ֆիդանը վերստին կհաստատի Ուկրաինայի անկախությանը, ինքնիշխանությանը և տարածքային ամբողջականությանը Թուրքիայի աջակցությունը, կհայտարարի, որ Անկարան պաշտպանում է կայուն հրադադարի հաստատումը և վերջնարդյունքում ամուր խաղաղության հաստատումը»,- հաղորդում է «Անադոլուն»:
Չափազանց կարևոր է, որ Թուրքիայի արտաքին գործերի նախարարը պատրաստվում է ևս մեկ անգամ վերահաստատել, որ սկզբունքորեն սատարում է ռուս-ուկրաինական հակամարտությունը կողմերի անկախությունը, ինքնիշխանությունը և տարածքային ամբողջականությունը հարգելու հիմքով կարգավորմանը:
ՆԱՏՕ-Ուկրաինա խորհրդի նիստին Եվրամիության արտաքին և անվտանգության հարցերի հանձնակատար, Եվրահանձնաժողովի փոխնախագահ Կալասի մասնակցությունը հուշում է, որ Ուկրաինային ռազմական, ֆինանսական, դիվանագիտական և մարդասիրական օգնության հարցում Եվրամիության և Հյուսիս-ատլանտյան դաշինքի ջանքերի համակարգման խնդիրն օրակարգային է:
Ակնհայտ է, որ ռուս-ամերիկյան «գործարքը», եթե անգամ հաջողվի համաձայնեցնել կարգավորման ընդհանուր պարամետրերը, տեսանելի ապագայում մնում է որպես «դիվանագիտական հնարավորություն», իսկ այդ ընթացքում պատերազմը շարունակվելու է:
Թուրքիայում բողոքի զանգվածային ցույցերին զուգահեռ Կրեմլի խոսնակ Պեսկովը հայտարարել է, որ Վլադիմիր Պուտինն ընդունել է Թուրքիա այցի հրավերը: Որոշ փորձագետներ այդ հայտարարությունն ընդունել են որպես Վլադիմիր Պուտինի կողմից Ռեջեփ Թայիփ Էրդողանին աջակցություն, բայց առայժմ հայտնի չէ, թե Ռուսաստանի նախագահը երբ կայցելի Թուրքիա:
Այս ֆոնին աչքի է զարնում Ֆրանսիայի և Թուրքիայի նախագահների հեռախոսազրույցը, որին, ինչպես տեսնում ենք, հաջորդում է ՆԱՏՕ-Ուկրաինա խորհրդի նիստը: Եվ եթե «Անադոլուի» դիվանագիտական աղբյուրները Ֆիդանի «տրամադրվածությունը» ճիշտ են փոխանցում, ապա ստացվում է, որ Թուրքիան հանդես է գալիս Ուկրաինային ռազմական և այլ կարգի օգնություն ցուցաբերելու օգտին:
Իսկ հրադադարի հաստատման ռուսական նախապայմաններից մեկն էլ Ուկրաինային բոլոր կարգի մատակարարումների դադարեցումն է: Եթե ՆԱՏՕ-Ուկրաինա խորհրդի նիստում նախանշվեն կոնկրետ ծրագրեր, ապա, ինչպես արևմտյան աղբյուրներն են գրեթե վստահաբար պնդում, հունիսին դրանք կներկայացվեն Հյուսիս-ատլանտյան դաշինքի գագաթաժողովին, որ ծրագրվում է անցկացնել Հաագայում:
Թուրքիան մինչև վերջերս հանդես էր գալիս ռուս-ուկրաինական բանակցությունները «հյուրընկալելու» նախաձեռնությամբ: Հաքան Ֆիդանը, ինչպես հասկացվում է «Անադոլուի» տարածած տեղեկատվությունից, Բրյուսելում այդ պատրաստակամությունը չի վերահաստատի: Անկարան բա՞ց է թողել «պատմական պահը»: Թուրքիայի և Եվրամիության ուրվագծվող համագործակցությունը կսրի՞ Հարավային Կովկասում ռուս-թուրքական մրցակցությունը:
